Бэлиитикэ Сүрүн

Сахамин Афанасьев Халыма-Индигир уокуругар бастаата

Ил Түмэн дьокутааттарын эбии быыбарыгар Халыма-Индигиир быыбардыыр уокуругар Айылҕа харыстабылын миниистирэ Сахамин Афанасьев быыбардааччылар 44,97 % куоластарын ылан, бастаата.

Кини кэнниттэн “Сиэрдээх Арассыыйа-кырдьык туһугар” баартыйаттан турбут Аркадий Клепечин 26,12 % куолаһы ылла. Евгений Татаев (“КПРФ”) – 11,45%, Евгений Рябченко (“ЛДПР”) – 8%, Ефим Захаров (“Партия за справедливость”) – 5,98% ыллылар.

Сахамин Афанасьев быыбардааччыларыгар махтанан туран, олохтоохтор этиилэрин баһылыктары, дьокутааттары кытары сөҥнөһөн бииргэ үлэлэһиэҕин туһунан иһитиннэрдэ. “Үөһээ Халыма, Муома, Өймөкөөн, Орто Халыма улуустарын быыбардааччыларыгар миигин өйөөбүттэригэр, үлэбин-хамнаспын, былааммын ылымматтарыгар махталбын тиэрдэбин. Нэһилиэктэр баһылыктарын, дьокутааттарын кытары бииргэ үлэлэһэн норуоппут этиитин, накааһын үрдүкү сокуону оҥорор былааска тириэрдиэхпит, үлэлэһиэхпит диэн эрэннэрэбин”, – диэн этэр Сахамин Миланович.

ЫСПЫРААПКА:

Сахамин Миланович Афанасьев – СӨ экология, айылҕа харыстабылын, ойуур хаһаайыстыбатын миниистирэ. 1973 сыллаахха Үөһээ Бүлүүгэ төрөөбүтэ. 1998 с. Иркутскайдааҕы судаарыстыбаннай техническэй университеты, 2003 с. Судаарыстыбаннай сулууспа Уһук Илиннээҕи академиятын бүтэрбитэ. 1998 сылтан Дьиэ-уот судаарыстыбаннай инспекциятыгар үлэлээбитэ. 2005 с. Аллараа Халыма оройуонун баһылыгын бастакы солбуйааччынан, 2009 с. “Комфорт” муниципальнай тэрилтэ дириэктэринэн, 2010 с. СӨ бэрэсидьиэнин уонна бырабыыталыстыбатын дьаһалтатын олохтоох салайыныытын департаменын салайааччытынан, 2011 с. “Биир ньыгыл Арассыыйа” баартыйа Саха сиринээҕи салаатын салайааччытынан үлэлээбитэ. 2014 с. Айылҕа харыстабылын миниистирэ.

Аграфена КУЗЬМИНА.

0
0