Бэлиитикэ

Сахамин Афанасьев: «Хайа баҕарар боппуруоска быыбардааччыларбын кытта атах-тэпсэн олорон кэпсэтэргэ бэлэммин»

Үс күннээх быыбар биэтэккэ кэлэн, иннэ-кэннэ билиннэ. Олортон биирдэстэрэ – Ил Түмэн дьокутааттарын эбии быыбарыгар Халыма-Индигиир уокуругар  СӨ Экологияҕа миниистирэ Сахамин Афанасьев бигэтик кыайбыта буолар.

Сахамин Милановичтан быыбар тэрээһинин туһунан аҕыйах тылы этэригэр көрдөспүппүтүгэр,  «Халыма-Индигиир биир мандааттаах уокурук быыбардааччылара, чуолаан Өймөкөөн, Үөһээ Халыма, Орто Халыма, Муома  улуустарын ытык-мааны олохтоохторо, барыгытыгар үтүө күн буоллун.  Үс күн устата Ил Түмэн 6-с ыҥырыылаах Мунньаҕар Халыма-Индигиир биир мандааттаах уокуругар дьокутаат быыбара буолан ааста. Бу ыҥырыылаах Мунньах өссө икки сыл үлэлиирэ хаалла. Онно миигин өйөөн куоласкытын биэрбиккитигэр ис сүрэхпиттэн махтанабын. Атырдьах ыйын устатыгар үс улууска сылдьан, нэһилиэнньэни кытта атах-тэпсэн олорон кэпсэтиигэ  туох кыһалҕалааххытын  үчүгэйдик билбитим уонна ону  быыһарар инниттэн бырагыраамабар барытын киллэрбитим. Итини олоххо киллэрэргэ үс улуус уопсастыбаннаһын, улуустар, нэһилиэктэр баһылыктарын кытта бииргэ үлэлииргэ бэлэммин биллэрэбин.

Быыбар туһунан кылгастык этэр буоллахха, үс улууска үрдүк тэрээһиннээхтик ыытылынна. Быыбары тэрийиигэ кыттыбыт дьоҥҥо барыгытыгар махталбын тиэрдэбин. Сокуону кэһии тахсыбата. Баартыйалартан турбут хандьытааттар быыбар сокуонун тутуһан  кытыннылар. Онон быыбар тэрээһиннээхтик уонна чиэһинэйдик барда.

Кыһын суол-иис турбутун кэнниттэн улуустарга тиийэн, хас биирдии нэһилиэккэ сылдьан,  олохтоохтору кытта хайаан да көрсүөҕүм. Бииргэ үлэлиир былааммытын өссө чопчулаан чуолкайдыахпыт. Дьокуускайга кэллэххитинэ, туох эмит боппуруостаах, кыһалҕалаах буоллаххытына,  хайаан да Ил Түмэҥҥэ биллээриҥ. Мин өрүү аһаҕаспын, хайа баҕарар боппуруоска быыбардааччыларбын кытта атах-тэпсэн олорон кэпсэтэргэ бэлэммин», — диэн иһитиннэрдэ.

0
0