Сахамин Афанасьев: «Экологияҕа инвестициялааһын кээмэйэ 8 млрд солкуобай кэриҥэ»

35 предприятие, ол иһигэр «АЛРОСА», «Газпром», «Колмар», «Таас-Үрэх нефтегазодобыча» экологическай бырагыраамаларыгар  анаан үп-харчы тыыралларын туһунан  СӨ айылҕа харыстабылын миниистирэ Сахамин Афанасьев суруналыыстары кытары көрсүһүү кэмигэр иһитиннэрдэ. Бу сыалга анаан туһааннаах хампаанньалар 7 млрд 900 мөл. солк. аттарбыттар.

edersaas.ru

Сир баайын хостооччулар, геологическай-чинчийэр үлэлэри ыытар хампаанньалар экология боппуруоһугар улахан болҕомтолорун уураллар. Өйдүүргүт эбитэ дуу, былырыын «Иркутскайдааҕы ньиэп хампаанньата» ХЭУо Сунтаардааҕы лицензионнай учаастак сирин-уотун алдьатан, ону ааһан бытовой бөҕүн-саҕын, бырамыысыланнай тобоҕун хомуйбакка барбытыгар улахан айдаан тахсан, тута хомуйбуттарын. Экологтар хонтуруол үлэтин күүһүрдэн, бу кэнниттэн маннык түбэлтэлэр тахса иликтэр.

Муниципальнай тэриллиилэр тулалыыр эйгэни харыстааһыҥҥа олохтоох бүддьүөттэриттэн Экология сылынан аҕыйаҕа суох үбү-харчыны көрбүттэрин туһунан Сахамин Миланович кэпсээтэ. Ол курдук, Бүлүү улууһа 6 мөл. солк., Дьааҥы – 3,5 мөл. солк., Ленскэй – 3,5 мөл. солк., Нерюнгри – 10 мөл. солк. тахса харчыны көрбүттэр. Буоларын курдук, бырамыысыланнай улуустар үбүлээһиннэрэ төһө эмит үрдүк.

Экология сылын чэрчитинэн сыбаалкалары көрүүгэ-истиигэ,хомуйууга киэҥ далааһыннаах үлэ ыытыллыбыт. Миниистир иһитиннэрбитинэн, 2017 сылга өрөспүүбүлүкэ үрдүнэн 309 бигэргэтиллибэтэх (несанкционированный) сыбаалкалар бааллара биллэн, 105-һэ хомуллубут уонна ыраастаммыт. Дьокуускай куоракка айдааннаах хаар полигона аадырыһа уларыйан, Даркылаах оройуонугар көһөрүллүбүт. «Саха сирэ» хаһыакка бу полигону көһөрүү туһунан биһиги хаста даҕаны туруорсан суруйан турабыт.

Арктиканы быраҕыллыбыт хаарбах тимиртэн ыраастааһын кэлиҥҥи сылларга күүскэ ыытыллар буолла. «Анаабыр алмаастара», «Сахаэнерго», РФ Оборонаҕа министиэристибэтэ, «ОДьКХ» ГУП уонна да атын тэрилтэлэр арктическай улуустартан 2800 туонна хаарбах тимири хомуйдулар.

Экология сылыгар өссө туох үлэ ыытыллыбытын уонна СӨ Айылҕа харыстабылын кэлэр сыллааҕы былааннарын туһунан «Саха сирэ» хаһыат 2018 сыллааҕы иккис нүөмэригэр бэчээттиэхпит.

Анивера Акимова, «Саха сирэ» хаһыат,  edersaas.ru