Сахамин Афанасьев: «Биологическай сэрии сэбэ олус кутталлаах. Арассыыйа ону суох оҥорорго дьулуһар»
Арассыыйа уонна Украина сыһыаннаһыыларыгар, биир дойдулаахтарбыт санааларын үллэстэллэр, бииргэ буоларга ыҥыраллар. Өр сылларга экология миниистиринэн таһаарыылаахтык үлэлээбит, билигин норуот дьокутаата Сахамин Афанасьев биологическай сэрии сэбэ туох кутталлааҕын уонна Арассыыйа ону утары сөптөөх дьаһалы ылыммытын туһунан кэпсээтэ.
Сахамин Афанасьев, Ил Түмэн сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ:
— Биологическай сэрии сэбин оҥоруу нэһилиэнньэ олоҕор-дьаһаҕар, доруобуйатыгар улахан кутталы үөскэтэр. Биологическай сэрии сэбэ дьону-сэргэни маассабайдык сүһүрдэн суох гынар аналлаах. Итиннэ хабааннаах араас сириэстибэни туттан Арассыыйаҕа утары санаалаахтар нэһилиэнньэҕэ улахан хоромньуну таһаара сатааһыннара сыыһа. Биологическай сэрии сэбин сириэстибэлэринэн араас патогеннай микроэттиктэр буолуохтарын сөп. Манна бактериялар, вирустар, тэллэйдэр, токсическай уонна биологическай дьааттар эмиэ киирэллэр. Маны биллэрбэккэ туһаныахтарын сөп. Итинник биэссэстибэлэринэн нэһилиэнньэни сутуйуу олус түргэнник уонна эчэтиитэ олус улахан буолара саарбаҕа суох. Маннык хабааннаах биологическай сэрии сэбин туһаныы аан дойдутааҕы дуогабарынан бобуллубута. Холобур, 1925 сыллаахха Женеватааҕы боротокуол оҥоһуллубута. Биологическай уонна токсиннаах сэрии сэбин туһанар бобуу конвенцията 1972 сыллаахха, оттон химическэй сэрии сэбин бобуу конвенцията 1993 сыллаахха тахсыбыттара.
Төһө даҕаны биологическай сириэстибэлэри туһаныы юридическай өттүнэн бобуулааҕын үрдүнэн уора-көстө туһаныы баар. Ол курдук, Арассыыйа кыраныыссатын аттыгар биологическай лабораториялар бааллара биллэр уонна кинилэр биһиги дойдубут нэһилиэнньэтигэр улахан кутталы үөскэтэллэр. Итинэн сибээстээн, соторутааҕыта Арассыыйа салалтата сөптөөх быһаарыныыны ылынан, Европа киин сиригэр-уотугар баар биологическай сэрии сэбин, ол эбэтэр лабораториялары суох оҥордо. Бу саамаай сөптөөх дьаһал.