Сахамин Афанасьев «Инстаграм» туһанааччыларын ыйытыыларыгар хоруйдаата
Бүгүн, ахсынньы 2 күнүгэр, СӨ Экологияҕа, айылҕаны туһаныыга уонна тыа хаһаайыстыбатыгар миниистирэ Сахамин Афанасьев «Инстаграм» социальнай ситимтэн быһа эпииргэ тахсан, өрөспүүбүлүкэ олохтоохторун кытта кэпсэттэ.
Сахамин Миланович дойдубут экологиятын бүгүҥҥү туругун туһунан сырдатта уонна туһанааччылартан киирбит ыйытыыларга эппиэттээтэ.
Дьон интэриэһиргиир ыйытыылара баар кыһалҕалары таарыйда. Маҥнайгы ыйытааччы тоҕо “Өлүөнэ очуостара” заповедник федеральнай бас билиигэ киирбитин туһунан туоһуласта. Бу ыйытыыга Сахамин Миланович заповедник федеральнай статуһу ылан, үбүлэниитэ кэҥээбитин туһунан быһааран кэпсээтэ:
— Заповедник эрдэ өрөспүүбүлүкэ бүддьүөтүттэн сылга 17 мөлүйүөн солкуобайынан үбүлэнэр эбит буоллаҕына, быйыл Арассыыйа бүддьүөтүттэн 100 мөлүйүөн кэриҥэ ылан, үлэлэрэ биллэ тубуста. Билигин бу тэрилтэҕэ 62 киһи үлэлиир буолла.
Маны сэргэ миниистир атын заповедниктар үлэлэрин, шелкопряд ааҥнааһынын утары үлэ, бултка электроннай сэрэбиэй, Өлүөнэ кытылыгар турар 203-с микрооройуон ууттан харыстанар тутууларын, Кэбээйигэ түһэр аракыата тобоҕун, экологияны харыстааһыҥҥа саҥа уларыйыылар туһунан ыйытыыларга чаас кэриҥэ кэм устата сиһилии кэпсээтэ.
Ордук чорботон мас кэрдии арааһын туһунан сырдатта. “Вырубка” уонна “лесозаготовка” диэн өйдүбүллэр уратыларын туһунан быһаарыы биэрэн баран, билигин ханнык тэрилтэлэр тыаны туттар сирдэригэр “компенсационнай сөргүтүүнэн” дьарыктаналларын туһунан кэпсээтэ. Роснефть, АЛРОСА курдук бөдөҥ тэрилтэлэр көхтөөхтүк сөргүтүү ыытан эрэллэр эбит.
Ону таһынан ойуур баһаардарын туһунан ыйытыылар киирдилэр. Сахамин Афанасьев бу сайын анал үлэһиттэри кытта олохтоох нэһилиэнньэттэн барыта холбоон 12 тыһыынчаттан тахса киһи үлэлээбитин туһунан кэпсээтэ, уоту бохсууга үлэлээбит дьоҥҥо махталын тиэртэ.
«Саха сирэ» хаһыат, edersaas.ru