Сахамин Афанасьев Арктика сайдыытын стратегиятын тула санаатын үллэһиннэ
Айылҕа харыстабылын миниистирэ Сахамин Афанасьев Саха сиригэр хотугу зонаны сайыннарыы былаана айылҕаны харыстыыр арыаллааһынаах буолуоҕа диэтэ. Ол курдук Саха сиригэр 2035 сылга диэри хотугу зона сайдыытын социальнай-экономическэй тосхоло баттанна. Бу былааннааһын докумуонун сыала-соруга Саха сирин олохтоохторун олохторун тупсарыыга туһуланна. СӨ Сахамин Афанасьев бу тула санаатын үллэһиннэ:
-Хотугу сири-уоту бырамыысыланнай өттүнэн үөрэтии уонна Өлөөҥҥө, Үөһээ Муунатааҕы алмааһы хостуур тэрилтэ бырайыагын, Халыма оройуоннарыгар көмүһү хостооһун, ньиэп-гаас үөскээһинин, ону сэргэ Анаабырга, Уус Дьааҥы улуустарыгар бырайыактара оҥоһуллуохтара. Экологтар өттүлэриттэн болҕомто ууруллуоҕа. Хотугу айылҕа олус намчы. Хонтуруола суох үлэлэр ыытылыннахтарына айылҕа эмсэҕэлиэн сөп. Ол иһин бырамыысыланнай үлэлэри ыытыыга эппиэтинэһи үрдэтии уонна өрөспүүбүлүкэ сиригэр-уотугар айылҕаны харыстыыр арыаллааһыннар ирдэниллэллэр. Маныаха ТКО, ол эбэтэр кытаанах хомунаалынай бөҕү харайыыга министиэристибэ өттүттэн ситимнээх үлэ барар. Ааспыт сылларга айылҕаҕа оҥоһуллубут хоромньу иһин тэрээһиннэр ыытыллыахтара. СӨ Айылҕа харыстабылын министиэристибэтэ бу хайысхаҕа үлэтин салҕыаҕа. Кулаардааҕы хвостохранилищены суох гыныы бырайыага оҥоһулунна. Инникитин элбэх үлэ күүтэр. Саха сирин олохтоохторун олохторо уйгуланарыгар, айылҕа харыстабылын министиэристибэтэ туруоруммут соруктарын ситиһэргэ үлэлиэҕэ.
Ульяна Захарова, edersaas.ru