“Сахамедиа” холдинг кэнсиэр тэрийэн, хаһыакка сурутууга хомуллубут 500 тыһ. солкуобайы «Арассыыйа почтатыгар» өрөспүүбүлүкэ оройуоннарыгар судаарыстыбаннай бэчээт таһаарыыларын тиэрдэргэ анаан туттарда.

“Сахамедиа” кэлэктиибэ “Саха сирэ” уонна “Якутия” хаһыаттарга сурутуу хампаанньатын улахан кэнсиэринэн саҕалаата. Бу киэһэ, алтынньы 5 күнүгэр, сурутууга 1000 купон толорулунна, ити улахан рекордунан буолар.

Холдинг хаһыаттара кэлэр сылтан босхо уонна төлөбүрдээх быысаһан  тахсыахтара. Ити түмүгэр ааҕааччылар хас ый ахсын иккилии босхо хаһыаты уонна икки төлөбүрдээх “халыҥ хаһыаты” тутуохтара. Эрэдээксийэлэр толкуйдааһыннарынан, нэһилиэнньэ киэҥ араҥата сөбүлээбит саҥардыллыбыт контеннаах уонна дизайннаах “халыҥ хаһыаттар” хамаҕатык атыыланыахтара.

Сүрүн, судаарыстыбаннай, национальнай!

“Сахамедиа” генеральнай дириэктэрэ Алексей Чертков ааҕааччылары маннык эҕэрдэлээтэ:

— Биһиэхэ, сүрүн судаарыстыбаннай национальнай сонуну киэҥник тарҕатар сириэстибэлэргэ хас биирдии сурутааччыбыт олус күндү! Биһиги ресурсабытын баай ис хоһоонноох уонна күрэстэһэр кыахтаах оҥороору төлөбүрдээх хаһыаттар медийнэй ырыынактарыгар эргиллэбит. Кырдьыктаах уонна анаарар ис хоһоонноох иһитиннэриигэ наадыйар эрэллээх ааҕааччыбыт биһиэхэ наадыйыытын чугастык ылынабыт. “Сахамедиа” кэлэктиибэ бу чэпчэкитэ суох соругу толоруоҕа – ааҕааччыларбыт сүтэрбит эрэллэрин төнүннэриэҕэ диэн эрэнэбин.

Сарсыҥҥы күнүгэр тута “Сахамедиа” салалтата СӨ УФПС  – “Арассыыйа Почтата” ФГУП филиалын дириэктэрэ Андрей Сусловтыын көрүстэ. Алексей Чертков почтовиктарга мөлүйүөн аҥаардаах сертификаты туттарда уонна өрөспүүбүлүкэ улуустарыгар сурутууну тэрийиигэ суруналыыстары кытта көхтөөхтүк бииргэ үлэлииллэригэр ыҥырда. Көрсүһүүгэ медиахолдинг уонна “Арассыыйа Почтатын” филиалын хардарыта бииргэ үлэлээһиннэрин саҥа көрүҥнэрин дьүүллэстилэр, балары өрүттэр олоххо киллэрэргэ бэлэмнэр.

Facebook  соцситимигэр бэйэтин страницатыгар Алексей Чертков Сурутааччы күнүн тэрийээччилэргэ махтанна:

— Сахамедиа” төлөбүрдээх хаһыаттарыгар бастакы тыһыынча сурутааччы баар буолла. Билиэттэри атыылааһынтан 500000 кэриҥэ солкуобайы  ыллыбыт, итилэри “Арассыыйа Почтатыгар” өрөспүүбүлүкэ оройуоннарыгар хаһыаттары тиэрдиигэ биэрэбит. “Сахациркэҕэ”, биһиги бииргэ үлэлэһэр кэлэктииптэрбитигэр – Эстрада тыйаатырыгар, маннык киэҥ хабааннаах тэрээһини  ыытарбытыгар ороскуоппутун аччатар кыаҕы биэрбит үгүс ахсааннаах спонсордарбытыгар, “Стройкон” тутар хампаанньаҕа махтанабын! Көрөөччүлэр эбии сервистэртэн олус астыннылар: маастар-кылаастартан, босхо медицинскэй көрдөрүүттэн, туһалаах бириистэри сүүйүүттэн, чэбдигирдэр процедураларга сертификаттартан уо.д.а. Саҥа көрсүһүүлэргэ сайаапка ыллыбыт, ол аата – биһиэхэ наадыйаллар, биһигини кэтэһэллэр. Сурутааччы күнүгэр анаан аан бастаан “Сахамедиа” гимнэ иһилиннэ. Биһиги иннибит диэки! 

Женни СТРЮКОВА, «Саха сирэ» хаһыат, Еdersaas.ru