Сарсын уонна өйүүн, кулун тутар 20-21 күннэригэр, Дьокуускайга «Сахамедиа» медиакиинигэр Дьокуускай куорат баһылыгар хандьыдааттар икки ардыларынааҕы дебат иккис эргимтэтэ быһа эпииргэ ыытыллыаҕа.
Ааспыт өрөбүллэргэ хандьыдааттар Дьокуускай куорат инфраструктуратын, ОДьКХ кыһалҕаларын тула кэпсэппит эбит буоллахтарына, бу сырыытааҕы дебат уһуйааннар, оскуолалар, тырааныспар уонна дьиэ тутуутун туһунан барыаҕа. Дебат 19.00 чаастан «Сахамедиа» ютуб-ханаалыгар саҕаланыаҕа.
Бэҕэһээ, кулун тутар 18 күнүгэр, «Сахамедиа» медиакиинигэр иккис эргимтэ сэрэбиэйэ ыытыллыбыта. Маныаха хандьыдааттар уонна кинилэр бэрэстэбиитэллэрэ кытыннылар.
Ол курдук, сарсыҥҥы дебакка сэрэбиэй түбэспитинэн Евгений Рябченко, Виталий Обедин, Айал Прокопьев уонна Савва Михайлов, оттон өйүүҥҥү дебакка Иван Комаров, Илья Паймушкин, Микаэл Заболотнай уонна Евгений Григорьев кыттар буоллулар.
Баһылыкка хандьыдаат Владимир Федоров сэрэбиэйгэ бэйэтэ да, бэрэстэбиитэлэ да кэлбэтэҕинэн, хаалбыт бэһис нүөмэрдээх кэмбиэр киниэхэ тиксэр. Ол эрээри, Владимир Федоров бэҕэһээ салгыы быыбарга кыттыбаппын диэн иһитиннэрии оҥорбута.
Дебаттары edersaas.ru, ЯСИА, Yakutia-Daily.ru саайтарга, итиэннэ «Якутия 24» уонна «Саха» НКИХ ханаалларыгар көрүҥ, «Тэтим» араадьыйаҕа истиҥ.
Модератордар — суруналыыстар Анна Фомина уонна Николай Борисов.
edersaas.ru