Аммаҕа командировкаҕа бара сылдьан элбэх оҕолоох эдэр ыалы, Егоровтары көрсөн кэпсэттим. Кинилэр Дьокуускай куоракка устудьуоннуу сылдьан билсибиттэр. Ыал ийэтэ Настя пединституту, онтон Олег ХИФУ саха тылын салаатын бүтэрбитэ. Түөрт оҕолоохтор, улаханнара быйыл 4 кылааһы бүтэрдэ, кыралара 7 ыйдаах. Егоровтар дьиэлэрэ Промкомбинат оройуонугар өрүс кытыытыгар турар буолан, олоччу ууга барда. Дьиэлээх хаһаайын муостатын көтүрэн, дьиэтин куурда сылдьар.
edersaas.ru
—Аммаҕа олохсуйбуппут уонча сыл буолла. Бастаан дьиэ куортамнаан олорбуппут. Онтон түөрт сыл анараа өттүгэр 1 мөл. 200 тыһ. кирэдьиит ылан уһаайбалаах дьиэ атыыласпыппыт. Ийэ хапытаалын туһанан, ипотекабытын аны сүүрбэччэ сыл төлөһүөхтээхпит. Биһиги итиччэ элбэх уу кэлиэ дии санаабатахпыт. Ол күн сарсыарда аҕабыт оҕолору оскуолаҕа, оҕо саадыгар илдьэ барбыта. Мин кыра уолбун кытта хаалбытым. Кэргэним: «Уу таһыма үрдээбит, көрө сылдьаар», — диэбитэ. Уулуссаны уу быһан эрдэҕинэ нэһиилэ куотан тахсыбыппыт. Билигин аймахтарбыт дьиэтигэр олоробут, аны күһүн дьиэбит кууруор диэри куортамнаһар санаалаахпыт, — диир Настя. «Сахамедиа» кэлэктиибин аатыттан биһиги кинилэргэ, «Амма олоҕо» хаһыакка үлэлиир биир идэлээхпитигэр, Олег дьиэ кэргэнигэр 50 000 солк. көмө харчы туттардыбыт.
Марианна ТЫРТЫКОВА, «Саха сирэ» хаһыат, edersaas.ru