Бүгүн, Эколог күнэ бэлиэтэнэр бэс ыйын 5 күнүгэр, тулалыыр айылҕаны харыстыыр соруктаах Арассыыйа бары эрэгийиэннэригэр “Күөх суугун марафона” аахсыйа тэрилиннэ.
Өрөспүүбүлүкэ бары улуустара бу суолталаах экологическай субуотунньукка көхтөөх кыттыыны ыллылар. Тэрээһиҥҥэ 3 тыһыынчаттан тахса киһи кытынна. Экология күнүгэр улуустарга чэпчэки атлетикаҕа эстэпиэтэ буолла, 1000 тиит араас көрүҥүн олортулар, эко-уруоктар буоллулар, “Саха сирин күөх пионердара” лааҕыр симиэнэтэ аһылынна. Сарсын, бэс ыйын 6 күнүгэр, Ленскэй улууһугар марафон чэрчитинэн Чернышевскайдааҕы балык собуотун уонна «АЛРОСА» акционернай хампаанньа үлэһиттэрэ Өлүөнэ Эбэҕэ ряпушка ыаматын ыытыахтара.
Бүтүн Арассыыйатааҕы “Күөх суугун марафона” аахсыйаҕа кыттыһан, СӨ Инновация, сыыппара уонна инфокоммуникационнай технология сайдыытын министиэристибэтэ сонуну киэҥник тарҕатар тэрилтэлэри түмэн, субуотунньугу Чочур Мыраан күөлүн тула тэрийдэ.
— Өрөспүүбүлүкэ бөдөҥ хаһыаттарыттан, интэриниэт-саайтарыттан, айар кэлэктииптэртэн 200-тэн тахса киһи Чочур Мыраан сирин-уотун ырастааһыҥҥа кытынна.
Былааны тэрилтэлэринэн эрдэттэн үллэрбиппит, онон үлэ түргэнник барда, — диэн бэлиэтээтэ киин куорат Сайсаар уокуругун салайааччыта Владимир Слепцов.
Ким ханан сылдьарын араарсаат, үлэлиир тээбирэннэрбитин ылаат, бары үлэлиир сирбитинэн тарҕастыбыт.
Үлэ былаана бэркэ аттарыллыбыт буолан, хас биирдии тэрилтэ бэйэ-бэйэлэригэр мэһэйдэспэккэ, бөҕү-сыыһы былааннаах сирдэрбитигэр чуо тиийэн хомуйдубут.
“Сахамедиа” холдинг үлэһиттэрэ бэрт тэрээһиннээхтик мустан, көхтөөхтүк үлэлээтилэр.
Чочур Мыраан күөлүттэн дьон сынньанар сирэ саҕаланар диэтэххэ, улахан бөҕө-сыыһа суох эбит.
Сүрүнннээн эргэ мас ыһылла сытар, пластик бытыылка, кумааҕы сыыс, бөх суох эбит диэн үөрдүбүт. Бу курдук куорат тэрилтэлэрин барытын мунньан, куораппыт уулуссаларын ыраастыы сылдьыахпытын наада эбит диэн санааҕа кэллибит. «Норуот күүһэ — көмүөл күүһэ» буоллаҕа.
Былааннаах үлэбитин бүтэрэн баран, сорукпутун толорбут дьон быһыытынан, үөрэ-көтө дьиэлээтибит.
Елена ПОТОЦКАЯ, “Саха сирэ” хаһыат.
Ааптар хаартыскаҕа түһэриитэ уонна видеота.