Өрөспүүбүлүкэбит күнүгэр Суорун Омоллоон аатынан Опера уонна балет тыйаатырыгар СӨ Национальнай Үҥкүү тыйаатырын Николай Петров салайааччылаах Национальнай оркестрын 25 сыллаах үбүлүөйдээх кэнсиэрэ буолла.
Манна, быһаччы эттэххэ, баар-суох саамай бастыҥ опернай ырыаһыттарбыт Национальнай оркестр доҕуһуоллаах, бэйэлэрин репертуардарыттан саамай бастыҥ, сөбүлүүр ырыаларын толорон, тыйаатыр саалатын тобус-толору мустубут көрөөччүлэри олус үөртүлэр, долгуттулар.
Аан бастаан үбүлүөйдээх оркестр саха композитора Владимир Ксенофонтов “Дьөһөгөй” той-увертюратын чаҕылхайдык толорон, махталлаах көрөөччүтүн дохсун ытыс тыаһынан наҕараадаланна. Бу Дьоро киэһэ Национальнай оркестр саха, нуучча норуодунай (“Валенки” нуучча норуодунай ырыата) муусукаларын, композитор Аркадий Самойлов (“Уруу” балеттан сюита), о.д.а. олохтоох муусукааннар бастыҥ айымньыларын үрдүк профессиональнай таһымҥа толорон иһитиннэрдэ, итиэннэ, эппиппит курдук, хас биирдии солист ырыатын доҕуһуоллаата.
Өрөспүүбүлүкэбит киэн туттуута – айылҕаттан айдарыылаах ырыаһыттарбыт бары биир-биир тахсан, хаһааҥҥытааҕар даҕаны олус өрө көтөҕүллэн, табыллан ыллаатылар. Ол курдук, С.Зверев-Кыыл Уола аатынан СӨ Национальнай Үҥкүү тыйаатырын оркестрын доҕуһуолунан СӨ үтүөлээх артыыһа Прокопий Неустроев бэйиэт Михаил Тимофеев тылларыгар, композитор Герман Комраков муусукатыгар “Мин айаас атым” ырыатын чаҕылхайдык толордо. Үс төгүл норуодунай – ССРС, РФ уонна СӨ норуодунай артыыһа, бары ытыктыыр киһибит Анегина Ильина “Над полями, да над чистыми” (Е.Горин муз., А.Рославлев тыллара) таптыыр ырыабытын бэлэхтээтэ. РФ уонна СӨ үтүөлээх артыыската Марина Силина “Ийэҕэ махтал” (Ст.Васильев мел., Т.Толомон тыллара) ырыатын кэрэ-чуор куолаһынан тардан кэбистэ. СӨ норуодунай артыыһа Григорий Петров “Күөрэгэйдиин көрсүһүүтүн” (В.Ноев мел., тыллара) дохсун ытыс тыаһынан көрүстүбүт.
Онтон, оркестр Василий Никитич Протодьяконов “Ньургуһуннарын” толоруутун саала долгуйан, тыыммакка да кэриэтэ олорон иһиттэ… СӨ норуодунай артыыстара Александр Самсонов, Николай Попов, Юрий Баишев, Мария Николаева, СӨ үтүөлээх артыыстара Владимир Павлов, Анна Дьячковская, Феодосия Шахурдина, Александр Емельянов, Анастасия Мухина, норуоттар икки ардыларынааҕы куонкурустар лауреаттара Егор Колодезников, Екатерина Захарова, хаһан да буоларын курдук, көрөөччү махталын ылыахтарын ылаллар. Ол курдук, “Родина”, “Вдоль по Питерской”, “Сардаҥалаах аартыгынан”, “Вдоль по улице метелица”, “Я люблю тебя, Россия”, “Сахам сирин халлаана”, онтон да атын бары сөбүлүүр ырыаларбытын дуоһуйа иһиттибит.
РФ уонна СӨ норуодунай артыыската Альбина Борисова сценаҕа тахсыбытыгар саала иһэ сырдыырга дылы буолла. Кини бэйиэт Степан Дадаскинов тылларыгар, композитор Кирилл Герасимов муусукатыгар “Екатерина Захарова кэриэһигэр” ырыаны дьоҥҥо-норуокка кэрэ, ыраас куолаһынан, олус долгутуулаахтык толорон, тиэртэ. РФ үтүөлээх, СӨ норуодунай артыыската Айталина Адамова-Афанасьева Виталий Андросов муусукатыгар, Петр Тобуруокап тылларыгар “Маҥнайгы хаар” ырыатын дьон тэҥҥэ ыллаһа олордо. РФ үтүөлээх, СӨ норуодунай артыыската – норуоттан тахсыбыт чаҕылхай талаан Нина Чигирева “Күөрэгэйдиин көрсүһүүтүн” (А.Алексеев мел., П.Тобуруокап тыллара) саалаҕа олорооччулар дохсун ытыс тыаһынан күндүлээтилэр. “Браво!”, “Бис!” – көрөөччү овациялыыр! Оттон РФ уонна СӨ норуодунай артыыһа, бастыҥ бааспыт Иван Степанов аатырбыт “Тыгын Дархан” (М.Данилова мел., В.Жирков тыллара. А.Попов орк.) ырыатын толоруутун дьон-сэргэ сүһүөҕэр туран иһиттэ.
Бырааһынньыктааҕы Улахан кэнсиэр ситиһиитин биир сүрүнэ – оркестр! Көрөөччүлэр муҥура суох махталбыт, тапталбыт бэлиэтэ бу тылларынан өйдөнүө дии саныыбын.
«Баар-суох бастыҥ ырыаһыттарбытын бука барыларын «тутан олорон», үчүгэй муусука, оркестр доҕуһуоллаах, дуоһуйа иһиттибит», — диэн көрөөччүлэр олус астыннылар.
Оркестр кылаабынай дирижера уонна уус-уран салайааччыта – Саха Өрөспүүбүлүкэтин искусствотын үтүөлээх деятелэ Николай Петров. Дьоро киэһэни Саха Өрөспүүбүлүкэтин култууратын үтүөлээх үлэһитэ Сардаана Федорова ыытта. Кэнсиэр режиссера – Саха Өрөспүүбүлүкэтин үтүөлээх артыыһа Прокопий Неустроев.
Татьяна МАРКОВА.