Соторутааҕыта өрөспүүбүлүкэ Сахалыы ситимнээх оскуолаларын бастакы тэрээһиннэрэ онлайн көрүҥүнэн ыытылынна.
Ол курдук, «Өбүгэ үгэһэ салҕанар аналлаах» — норуот педагогикатыгар олоҕурбут Төрөппүт ааҕыыларын Амма улууһун Болугур оскуолата тэрийдэ.
Бу өрөспүүбүлүкэтээҕи сахалыы ситимнээх оскуолаларга Дьокуускай куораттан “Айыы кыһата”, Саха гимназията, Нам гимназията, Амматтан Болугур, Бөтүҥ, Тааттаттан Чөркөөх, Мэҥэ-Хаҥаластан Мэлдьэхси оскуолалара киирбиттэрэ.
Бастакы тэрээһиҥҥэ 13 оскуола кыттыыны ылла. Ааҕыылары истии түөрт бөлөҕүнэн, “Эппиэттээх төрөппүт” бырайыак чэрчитинэн ыытылынна. Төрөппүттэр, учууталлар оҕону сахалыы тыыҥҥа иитиигэ бэйэлэрин үлэлэрин билиһиннэрдилэр.
Ол курдук, Ааҕыылар түмүктэринэн Мэлдьэхси орто оскуолатыттан Туйаара Алексеевна Игнатьева “Чэбдик олохтоох, айыы сиэрдээх дьиэ кэргэн – омук кэскилэ” үлэтинэн I үрдэли ылары ситистэ. “Төрөөбүт дойдум саҕаланар дьиэбиттэн, тэлгэһэбиттэн” диэн дьиэ кэргэн бырайыагынан II үрдэлгэ Анна Николаевна Герасимова таҕыста. Алена Дмитриевна Степанова — III үрдэл (“Киһи айылҕа оҕото”), Уйгуяна Семеновна Шарина — III үрдэл (“Дьиэ кэргэҥҥэ өбүгэ оонньуутун чиҥэтии”) буоллулар, оттон Иван Лазаревич Гоголев «Үлэнэн оҕо дьоҕурун бастыҥ сайыннарааччы» анал ааты (“Эһээ – аҕа – уол оҕо утум быстыспат ситимэ”) ылан, биир дойдулаахтарын үөртүлэр.
Ааҕыыларга барыта 71 төрөппүт уонна учуутал кыттыыны ылан, оҕону иитиигэ үлэлэрин билиһиннэрдилэр, үөрүйэхтэрин атастастылар.
Надежда АНДРОСОВА,
Мэҥэ-Хаҥалас.
Сүрүн хаартыскаҕа: Анна Герасимова