Кыралыын-улаханныын, бүгүҥҥү ирдэбилинэн, дьиэҕэ олорор, ыраахтан үлэлиир, үөрэнэр дьоҥҥо интэриниэт ситимин суолтата өссө үрдүүр. Айар куттаах дьон хоһоон ааҕар, остуоруйа кэпсиир, тыйаатырдар испэктээктэрин көрдөрөллөр, оттон Саха тыйаатырын артыыһа Валентин МАКАРОВ оҕолорго мульткиинэни сахалыы саҥарта.
edersaas.ru
-Кэнники кэмҥэ анимация эйгэтэ интэриниэт ситимигэр киэҥник тарҕанна. Нууччалыы, омуктуу тылынан араас мультиктар тэлэбиидэнньэҕэ даҕаны, интэриниэккэ (ютубка) даҕаны кэмэ суох элбии тураллар. Олор быыстарыгар, саамай кырачааннарга анаан, ырыа-мультиктар биир сүрүн миэстэни ыллылар. Ол мультиктар оҕону сыыппараны ааҕарга, дьүһүнү араарга, дьыл кэмин, бириэмэни билэргэ үөрэтэллэр. Ол эрээри, хомойуох иһин, бэйэбит төрөөбүт тылбытынан ол хайысхаҕа мультиктар суохтарын кэриэтэ. Муусука уонна анимация холбоһон, кырачаан оҕо болҕомтотун тардар дьикти күүһү үөскэтэллэр эбит. Холобура, мин оҕом (биир саастаах) оннук мультиктары наһаа сөбүлээн көрөр. Ол иһин, боруобаҕа диэн, икки оннук нууччалыы анимацияны кэргэмминээн сахалыы тылбаастаан таһаардыбыт уонна оҕобутугар көрдөрөн көрдүбүт. Наһаа сөбүлээтэ. Этэргэ дылы, астынан, дорҕоонноохтук күлэ-үөрэ түһэр!
Ол аата биһиги маннык хайысханы сахабыт тылынан сайыннарыахпытын сөп эбит. Дьиҥинэн, аҥаардас тылбааһынан эрэ муҥурданыахха сөп этэ даҕаны, бу, ырыа-мультиктары оҥорор тэрилтэ ааптарыскай быраабын кэһии буолар эбит, ол иһин бу тылбаастаабыт үлэлэрбин ютуб канал таһаарбата. Холобура, You Tube канал бу үлэлэри таһаарбыта буоллар, саха дьоно (тыаҕа буоллун, куоракка буоллун) баҕалаах барыта оҕолоругар холбоон, көрө сылдьар буолуо эбиттэр. Онон кынаттанан, баҕар өссө элбэх мультиктары тылбаастыа этибит, ону итинник балаһыанньа кыратык санаабын түһэрдэ диэххэ сөп.
Билиҥҥи курдук интэриниэт үйэтигэр, бу хайысха бэйэбит Сахабыт сиригэр сайдара буоллар, оҕолорбут хаарыан сахабыт тылын иҥэринэллэригэр улахан да улахан төһүү буолуох эбит, – диэн Валентин Макаров санаатын үллэһиннэ.
Валентин бу бырайыагын сайыннарар былааннаах — анимацияҕа үлэлиир уонна үөрэнэ сылдьар дьону көрдүүбүн, диэтэ. Онон, интэриэһиргээбит буоллаххытына, киниэхэ meneuola@mail.ru электроннай почтатыгар суруйаргытыгар этии киллэрэр.
Кырдьык, биһиги оҕолорбутугар, сиэннэрбитигэр төрөөбүт тылбытынан мульткиинэлэр элбииллэригэр, талбыт курдук, араас буолалларыгар баҕарабыт. Оччотугар, үлэлиэн, айыан баҕалаах ыччаттарбытын өйүүрбүт буоллар!
Валентин үлэтин ссылканан киирэн көрүҥ: https://yadi.sk/d/-a4UAFp9cBYMyg
Татьяна МАРКОВА.