ХОЙ. Хаһан эрэ саҕалаабыт бырайыаккар ылсыаҥ. Бииргэ үлэлиир киһигин кытары тыл тылгытыгар киирсимиэххитин, өйдөһүмүөххүтүн сөп. Бу бэлиэҕэ төрөөбүт сорох дьон кыра харчыны тутан, хамнаһыҥ кыччаан эбэтэр бириэмийэттэн матан санааҕыт түһүө. Оттон ким эрэ эбээһинэһэ кыччаан эбэтэр уоппускаланан үөрүө-көтүө. Сэрэдэҕэ тугуҥ да табыллыбат курдук буолан ылыа. Ол эрээри, сарсыҥҥытыттан саҕалаан барыта тупсан, көнөн, өссө ылсыбытыҥ санааҥ хоту табыллан соһутуо. Нэдиэлэ бүтүүтэ ким эрэ эйиэхэ кистэлэҥин арыйыа. Онно эн сүбэҥ-амаҥ наада буолуоҕа.
ОҔУС. Нэдиэлэ бастакы күннэригэр харчы тутуоҥ эбэтэр эбии харчылаһар кыах үөскүө. Салгыы хайдах эбии харчылаһарыҥ бэйэҕиттэн тутулуктаныа. Бу күннэргэ урут саҕалаабыт үлэҕэр ылсарыҥ ордук буолуо. Ким эрэ эн саҕалаабыккын түмүктүүргүн кэтэһэр. Ыра санаа оҥостубуккун бу нэдиэлэ бүтүүтүгэр атыыластаххына өр сулууспалыа. Үлэҕэр, дьиэҕэр саҥаҕа, сонуҥҥа ылсыбытыҥ табыллыа. Чугас дьонуҥ, оҕолоруҥ эн болҕомтоҕор наадыйаллар. Өрөбүллэргин кинилэри кытары атаардаххына, дьиэҕэр өр кэмҥэ үчүгэй сонун киирэ туруо, ситиһии кэлиэҕэ.
ИГИРЭЛЭР. Бу күннэргэ сөргүтүнэн, уруккуну-хойуккуну ырытан, толкуйдаан көрөрүҥ үксүүр. Онуоха үөһэттэн күүс-уох кутуллан киирэр курдук буолуоҕа. Бэйэҕэр эрэлиҥ улаатыа. Үлэҕэр да, тус бэйэҕэр да көрүүгүн, сыалгын-соруккун уларытыаҥ. Нэдиэлэ бүтүүтэ үгүөрү үбү тутуоҥ. Дьиэҕэр наадалаах мал-сал атыылаһыаҥ. Дьиэҕэр ил-эйэ олохсуйуо. Түүлгүн дьоҥҥо кэпсээмэ, болҕомтоҕун уур. Субуотаҕа ханна да айаннаама. Өрөбүллэргин чугас дьоҥҥун кытары атаар.
АРААК. Үлэҕэр, дьиэҕэр саамай наадалаах киһи буолуоҥ. Ханна туох буоларыгар барыта эн быһаарыыҥ суолталаныа. Нэдиэлэ иккис аҥарыгар бу бэлиэҕэ төрөөбүт сорох дьон доруобуйаҕытын көннөрүнэ, чэбдигирдинэ түһэргит наада буолуоҕа. Билиигин-көрүүгүн хаҥатынаргар саамай үчүгэй күннэр үүммүттэр. Нэдиэлэ бүтүүтэ үлэ-хамнас элбээн туруон сөп. Ону кэмигэр бүтэрэргэ, толорорго кыһалын. Өрөбүллэргэ сибиэһэй салгынынан тыын. Түүлгэр эбэтэр ыраахтан истэр сонуҥҥар болҕомтоҕун уур. Ону чугас аймаххар, аҕам саастаах киһиэхэ кэпсээтэххинэ, сүбэ-ама биэриэҕэ.
ХАХАЙ. Тапталгыттан, оҕолоргуттан тутулуктаах курдук буолуоҥ. Ис санааҕар эн үлэҕин сыаналыылларыгар эрэҥкэдийэн, уопсастыбаннай үлэҕэ хаһааҥҥытааҕар да күүскэ ылсыаҥ. Ол эрээри, баҕа санааҥ туолара саарбах. Олус элбэх дьону кытары билсибиккин эрээри, биир да киһи эйигин өйүө суоҕа. Санааҕын олус түһэримэ, үп-харчы боппуруоһа үчүгэй. Сотору кэминэн бириэмийэ тутан үөрүөҥ. Улахан суолталаах кэпсэтиини, үлэни туора дьон билбэтэ ордук. Өрөбүлгэ кэлэктиипкин, табаарыстаргын кытары көрсүөххүн сөп. Онно тахсыбыт үчүгэй кэпсэтии эн эбии харчылаһаргар кыаҕы биэриэ.
КЫЫС. Үлэҕэр, дьиэҕэр түбүк-садьык элбиэҕэ. Урукку мэһэйтэн сылтаан ньиэрбинэйдээн ылыаҥ. Ону таскар таһаара, айдаара сатаама. Оччоҕуна барыта ааһан орун-оннугар түһэн хаалыа. Ол оннугар дьиэҕэр-уоккар ыһыллыбыты-тоҕуллубуту өрө тарт. Дьиэҥ кыылыгар-сүөлүгэр болҕомтоҕун уур. Сэрэдэҕэ, чэппиэргэ үчүгэй сонун санааҕын көтөҕүө. Үлэҕэр үрдээһин күүтэр эбэтэр туруоруммут сыалыҥ-соругуҥ туолуо. Нэдиэлэ бүтүүтэ ыалдьыттар кэлиэхтэрэ. Кинилэр эйиэхэ кээлэр өртүгэр көмөлөрө элбэх буолуо. Өрөбүллэргин чугас дьоҥҥун кытары атаарарыҥ ордук.
ЫЙААҺЫН. Бу күннэргэ билиигин-көрүүгүн, сатабылгын көрдөрүөҥ. Онуоха ылсыбытыҥ барыта сатанан иһиэ. Бэйэҕэр эрэллээх буол. Бу нэдиэлэҕэ балачча үбү-харчыны туттуоҥ, суолталааҕы, наадалааҕы атыылаһыаҥ. Ол гынан баран, тапталлааххын кытары уопсай тыл булумуоххутун сөп. Онтон бу бэлиэҕэ төрөөбүт дьиэ кэргэннээхтэр оҕолоргутугар чугас буолуҥ. Кинилэр кыһалҕаларыгар эн көмөҥ, өйөбүлүҥ олус наада. Сорох ыйааһыннар урукку тапталгытын соһуччу көрсүөххүт. Бэл, кини тугу диирин эрэ истэр, кини баҕарбытынан хамсанар курдук буолан ылыаххыт. Нэдиэлэ ортотугар ыраах айаннаабатыҥ ордук.
СКОРПИОН. Бу күннэргэ урут ылсыбыт үлэҕитин түмүктээн өрө тыыныаххыт. Бииргэ үлэлиир дьоҥҥун кытары өйдөһүмүөххүтүн сөп. Ким да тылыгар киирэн биэримэ, искэр тута сылдьыбыккын кэпсээмэ, санааҕын этимэ. Чэппиэргэ үлэҕэр ситиһиилэнэр күнүҥ. Ордук бу күн дьыалаҥ-куолуҥ табыллыа, үлэҥ-хамнаһыҥ тахсыылах буолуо. Бээтинсэҕэ ханна эрэ айанныаххын сөп. Субуотаҕа улахан тэрээһиҥҥэ, бырааһынньыкка сылдьа сатаама. Онно сырыттаххына сэниэҥ-онооҥ бараммыт, сылайбыт курдук буолан хаалыаҥ, күүһүҥ-уоҕуҥ түргэнник бараныа. Ол оннугар сибиэһэй салгын, сарсыардааҥҥы сэрээккэ, чугас дьоҥҥун кытары сынньалаҥ туһаны эрэ аҕалыа.
ОХЧУТ. Соторутааҕыта буолбут дьыалабыай кэпсэтииҥ түмүгэ көстүө. Үлэҕинэн чугастык билсэр дьоҥҥуттан ким эрэ тэйиэ, сибээстэспэт буолан хаалыа. Онтон иҥнэн хаалыма, санааҕын түһэримэ. Көрсүһүүнү нэдиэлэ бастакы аҥарыгар былааннаа. Онно саҥа туһалаах билсиһии олохтонуо. Дьиэҕэр-уоккар балачча харчыны хамсатар уларыйыы күүтэр. Эбэтэр чугас дьонуҥ ыраах сынньана айанныахтара, эбэтэр сыаналаах малы-салы ылыаххыт. Бу бэлиэҕэ төрөөбүт кэргэнэ суохтар тус олоххутугар тупсуу, ситиһии күүтэр. Чугас доҕордонуоххут эбэтэр ыал буолуоххут.
ЧУБУКУ. Үпкэ-харчыга, уопсастыбаннай үлэҕэ сыһыаннаах кистэлэҥи билиэххит. Онуоха бу нэдиэлэҕэ элбэх харчыны матайдыаххыт эрээри, ону төттөрү толорон иһэргэр эбии үлэ көстүө. Доруобуйаҕар болҕомтолоохтук сыһыаннас. Кыра да, алҕас да тымныйыыны уһата-кэҥэтэ сылдьыбатыҥ ордук. Чэгиэн олоҕу тутус, ордук бу күннэргэ кыраадыстаахха чугаһаама. Дьиэҕэр ыттаах эбэтэр куоскалаах буоллаххына, туһалаан соһутуо. Эбэтэр кыыл-сүөл иитэ ылыаххын баҕарар буоллаххына, бу күннэргэ ыларыҥ ордук. Ыт бэриниилээх доҕор, харабыл, онтон куоска эмтиир буолуо. Дьиэҕэр-уоккар сыһыаннаах боппуруостары өрөбүллэргэр быһаар. Нэдиэлэ бүтүүтэ ыраахтан сонун истиэҥ, кэһии тутуоҥ.
КҮРҮЛГЭН. Нэдиэлэ саҥата үлэҕэр барыта этэҥҥэ, үчүгэй. Ол эрээри, оптуорунньуктан-сэрэдэттэн саҕалаан салалтаҥ сорудаҕы бииртэн биир тохтоло суох биэрэ туруоҕа. Ону барытын кэмигэр бүтэрэргэ кыһалларыҥ ордук. Онуоха урукку ньымаҕын тутуһан үлэлээтэххинэ, кыайыылаах, ситиһиилээх буолуоҥ. Оптуорунньукка-сэрэдэҕэ кыһаллыбытыҥ, сүүрбүтүҥ-көппүтүҥ түмүгэ нэдиэлэ бүтүүтэ көстүөҕэ, биллиэҕэ. Эбии харчылаһаргар этии киириэ. Өрөбүл күннэргиттэн саҕалаан сэрээккэҕэ ылыстаххына, йоганан дьарыктаннаххына доруобуйаҥ биллэ тупсуо.
БАЛЫКТАР. Сүрүн сыалгар-соруккар болҕомтоҕун уур. Үлэҕэр тыл тылга киирсибэт, өйдөспөт буолуу тахсыан сөп. Онуоха үп-харчы боппуруоһа сытыырхайан туруо. Оттон үлэҕинэн бу күннэргэ ыраах айан туох да ситиһиини аҕалыа суоҕа. Сулустар нэдиэлэ ортотугар үлэҕэр саҥа сүүрээн киириэ диэн этэллэр. Өрөбүллэргэр ыраахтан ыалдьыттар эбэтэр көрсүбэтэҕиҥ ырааппыт доҕотторуҥ кэлиэхтэрин сөп. Ханна эрэ сынньана, бириэмэни атаара барарга ыҥырыахтара. Ол эрээри, өрөбүлгүн дьиэҕэр атаарарыҥ ордук буолуо. Аҕам саастаах чугас аймаххын кытары астына-дуоһуйа кэпсэт. Ол санааҕын сааөылыыргар көмөлөөх буолуоҕа.
