ХОЙ. Сыалгын-соруккун сыранан ситиһиэҥ. Кылаабынайа, тугу да түргэнник быһаара охсума. Төһө да түбүк-садьык баарын иһин, үчүгэй сонуннары истиэҥ, үөрүөҥ, онтон санааҥ улаханнык көтөҕүллүө. Сэрэйэн көрөр дьоҕуруҥ күүһүрэн, дьон ис санаатын, туох эрэ түмүгүн хаһааҥҥытааҕар да эрдэттэн билиэҥ. Чугас дьонуҥ тугу баҕаралларын кытары тута өйдүөҥ. Ол түмүгэр, ил-эйэ саарыстыбата дьиэҕэр, үлэҕэр олохсуйуо. Эбии үп-харчы тутан үөрүөҥ. Бу күннэргэ кимиэхэ эрэ көмөлөһүүҥ, бэлэх уунууҥ бэйэҕэр уон төгүл үтүөнэн, үчүгэйинэн эргиллиэ.
ОҔУС. Бу нэдиэлэҕэ көрсүбүт харгыстаргын хаһааҥҥытааҕар да түргэнник туоратыаҥ. Санааҥ бөҕөх, күүс-уох үөһэттэн кутуллар курдук буолуоҕа. Туох барыта эн тускар, туһаҕар. Онон тугу саҕалыыргын барытын бу күннэргэ тутуһан оҥорор. Дьону-сэргэни кытары тута өйдөһөҕүн, уопсай тылы булаҕын. Ол гынан баран, эйиэхэ үчүгэйи баҕарбат дьон баалларын билиэҥ. Оттон соторутааҕыта аҕай эйигинниин мөккүспүт, иирсибит дьон эн диэки буолан туруохтара. Доруобуйаҕын чэбдигирдинэргэр саамай тоҕоостоох күннэр үүммүттэр.
ИГИРЭЛЭР. Нэдиэлэ саҥатыгар наһаа элбэх түбүк-садьык баар. Итинтэн сиэттэрэн саҥа толкуйдар киириэхтэрэ. Кимниин эрэ тыл тылгытыгар киирсиэххит суоҕа. Ол гынан баран, ол түргэнник умнуллуо. Күн аайы санааҥ көтөҕүллэн, күүс-уох эбиллэн иһиэ. Онуоха үчүгэй сонуннар үөрдүөхтэрэ. Ол эрээри, “ыстаабыккын эрэнимэ, ыйыстыбыккын эрэн” диэн өс хоһооно баарын умнубатыҥ ордук. Нэдиэлэ бүтүүтүгэр олус интэриэһинэй билсиһии күүтэр. Өрөбүллэргин бэйэҕэр туһалаахтык атаарарга кыһалын. Сэрээккэттэн биллэрдик чэбдигириэҥ.
АРААК. Быһаарыллыбакка хаалбыт боппуруостаргын ситэрэриҥ-хотороруҥ табыллыа. Онуоха бытаарыма, тугу да кэнники күннэргэ хаһааныма. Сэрэйэн көрөр дьоҕургар эрэн. Көмөлөһүннэрэ үөрэммит дьоҥҥор эрэнэн баран олорума. Бу сырыыга кинилэр эйиэхэ өйөбүл буолартан аккаастаныахтарын сөп. Дьикти түүллэргиттэн, эрдэттэн сэрэйбитиҥ курдук, дьиибэ түбэлтэлэртэн соһуйарыҥ элбиэ. Итилэр эн сөптөөх хардыылары оҥороргор көмөлөһүөхтэрэ. Туора дьон этиитин, ыйыытын-кэрдиитин ылыныма. Киирбит этиилэри толкуйдаан көр.
ХАХАЙ. Тургутар күннэри-дьыллары этэҥҥэ аһарар курдук кыһалын. Таах олорбокко үлэлээн-хамсаан, барытыгар ылсан, санааҕын этэн, тиэрдэн ис. Оччоҕуна эрэ барыта этэҥҥэ быһаарыллыа. Кыһалҕаҕар, ыктарар күннэргэр ким да көмөлөһүө суоҕа. Ол гынан баран, туһалаах сүбэ-ама биэриэхтэрин сөп. Бу күннэргэ араас майгылаах-сигилилээх, туспа, туора көрүүлээх дьоннуун элбэхтик алтыһыаҥ. Онно эн киэҥ көхсүлэнэриҥ, толкйдаах буоларыҥ наада. Оннук гынар түбэлтэҕэр, бэл, ким да тапсыбат дьонун кытары өйдөһүөҥ, тылгын ылыннарыаҥ. Ол түмүгэр, эйигин өйүүр дьон көстөн кэлиэхтэрэ. Билиигин-көрүүгүн хаҥатыыҥ туһалыа.
КЫЫС. Бу күннэргэ тургутуулары тулуйдаххына, барыта орун-оннугар буолуо, үөрүү, ситиһии өрөгөйдүө. Онон элбэҕи быһаарарга, түбүгүрэргэ-садьыгырарга бэлэмнэн. Арыт, барыта биир кэмҥэ буолары кытары холкутук кыайа-хото тутуоҥ. Бэл, иирсибит дьону эйэлэһиннэриэҥ. Ол гынан баран, үлэҕэр балаһыанньа уларыйа сылдьара долгутуо. Оннооҕор биир санаалаахтарыҥ эйигин утаралларын курдук толкуйга киириэҥ. Санааҕын түһэримэ. Эйиэхэ көмөлөһөргө, эйигин өйүүргэ бэлэм дьон баалар. Эн ыҥырыаҥ, этиэҥ эрэ кэрэх. Бу нэдиэлэҕэ элбэх харчы хамсыа. Онно чугас доҕотторуҥ, аймахтарыҥ көмөлөһүөхтэрэ.
ЫЙААҺЫН. Сэргэх нэдиэлэ. Саҕалаабытыҥ улаатан өссө элбэх үлэни, сыраны эрэйиэ. Онно доҕотторуҥ, кэллиэгэлэриҥ көмөлөрө наада буолуоҕа. Эрдэттэн былааннаахтык хардыылаа. Туох баар кыһамньыгын, дьоҕургун көрдөрөр кэмиҥ. Онуоха туохха эрэ эбии үөрэнииҥ туһалыа. Ол түмүгэр, олус туһалаах, эрэллээх киһилиин билсиһиэҥ. Ыраах айаннаама. Доруобуйаҕын көрүн. Чугас дьоҥҥор болҕомтоҕун уур.
СКОРПИОН. Түбүктээх нэдиэлэ. Үлэҕэр саҥаны, сонуну киллэрэриҥ ирдэнэр. Туох баар күүскүн, болҕомтоҕун үлэҕэр уур. Түмүгэр дуоһунаһыҥ үрдүөн, бириэмийэ тутуоххун сөп. Дьиэҕэр үөрүү-көтүү буолара тус бэйэҕиттэн тутулуктаах. Ыраахтан ыалдьыттар кэлиэхтэрэ. Өрөбүллэргин чугас дьоҥҥун кытары атаар. Соҕотох сылдьааччылары билсиһии күүтэр.
ОХЧУТ. Судургута суох күннэр. Үлэҕэр да, тус олоххор да ураты уонна сонун сүүрээннэри толкуйдаан киллэр. Онно чугас дьоҥҥун тардарыҥ ордук. Оччоҕо эрэ кыайа-хото тутуоҥ. Ол гынан баран, саҕалаабыккыт түмүгүн көрө охсорго тиэтэйимэ. Ыраахтан ыалдьыт кэлиэн эбэтэр умнубут киһигин көрсө түһүөххүн сөп. Уруккуттан чугастык доҕордоһор, билсэр дьонуҥ эйиэхэ ханнык баҕарар боппуруоска өйөбүл буолуохтара, туһалаах сүбэ-ама биэриэхтэрэ. Нэдиэлэ бүтүүтэ хаһааҥҥытааҕар да холкутуйуоҥ. Истиҥ көрсүһүү санааҕын көтөҕүө. Баҕа санааҥ туолуо.
ЧУБУКУ. Тулуурдаах буоллаххына, элбэҕи ситиһиэҥ. Тулаҕар туох буоларын тиэтэтимэ, түмүгү билэ, көрө охсорго ыксаама. Барыта кэмнээх-кэрдиистээх. Онуоха туох эрэ урут буолбут хатыланыа. Онно урукку алҕастаргын өйдөөн, ону хатылаабат курдук кыһалын. Нэдиэлэ ортотуттан саҕалаан үлэҕэр ситиһиилэр, үчүгэй сонуннар элбиэхтэрэ. Истиҥник саныыр дьоҥҥун кытары көрсөн астына-дуоһуйа кэпсэтиэҥ. Кинилэр сүбэ-ама биэриэхтэрэ. Түүлгэр болҕомтоҕун уур, кимиэхэ да кэпсээмэ. Былааҥҥын искэр тут.
КҮРҮЛГЭН. Боччумнаах буол. Барытыгар толкуйдаахтык ылыс, эппиэтинэскин хаһааҥҥытааҕар да үрдэт. Сыалгын-соруккун ситиһэргэр элбэх сыраҥ-сылбаҥ бараныа. Ким да көмөлөһөр киһи суох курдук буолуо. Ол оннугар, төттөрүтүн эн көмөҕөр наадыйааччы хаһааҥҥытааҕар да элбиэ. Кэллиэгэлэргин кытары тыл тылга киирсимиэххин сөп. Ол үлэҕэр мэһэйдиэ. Туохтан эрэ мунчаарыаҥ, санааҕа баттатыаҥ. Ол эрээри, онтон иҥнимэ. Кылаабынай соругуҥ — үлэҕэр болҕомто. Онтон атына сыыйа орун-оннугар түһэн иһиэ. Холкутуй. Тылыҥ-өһүҥ күүһүрбүт кэмэ. Онон санаатыҥ да саҥарыма.
БАЛЫКТАР. Үөскүүр боппуруостары чопчулуу, быһаара охсуоххун баҕараҕын эрээри, судургута суох буолуо. Онуоха туохтан эрэ сылтахтанан, санааҥ тосту-туора уларыйыан сөп. Оччотугар ылыммыт былааҥҥын эмиэ уларытан туруоҥ. Онуоха бу күннэргэ чугастык саныыр доҕоруҥ кистэлэҥин билиэҥ. Бэйэҕин да атыннык көрүөҥ. Сороҕор сүүрүк устун баран иһэбин диэн санаалар үүйэ-хаайа тутуохтара. Онуоха күүскүн-уоххун түмтэххинэ, үчүгэйдик толкуйданнаххына, сыалгын, баҕаҕын ситиһэргин умнума. Бу нэдиэлэҕэ үлэҕэр тургутан көрүүлэртэн куттаныма. Билииҥ-көрүүҥ, сатабылыҥ ханнык да балаһыанньаттан тахсаргар көмөлөһүөхтэрэ.
