ХОЙ. Бу күннэргэ наһаа имэҥириэх баҕаҥ улааппытытан, күүһүрбүтүттэн арыый туттунарыҥ ордук. Күнүүттэн сылтахтанан иирсээн тахсыан, уокка арыыны кутан биэриэххин сөп. Ол оннугар оҕолоргор, чугас дьоҥҥор болҕомтоҕун уур. Сынньалаҥҥын чугас дьоҥҥун кытары бииргэ атаарар туһунан толкуйдан.
Тапталынан үлүһүйүмэ. Ордук саҥа билсиһииттэн сэрэн. Албыҥҥа-көлдьүҥҥэ киирэн биэриэххин сөп.
Доруобуйаҕын көрүн. Аскын-үөлгүн бэрин. Сибиэһэй салгыҥҥа элбэхтик хаамп, кыралаан хамсаныы-имсэнии туһалаах буолуо.
Үлэҕэр күүскэ ылыс. Утумнаахтык, турунан үлэлээтэххинэ, бу күннэргэ эбии харчылаһаргар суол арыллар кыахтаах.
ОҔУС. Бу нэдиэлэҕэ үлэҕэр сыалла-сорукта туруорун. Уонна ону толорор туһугар хамсан, сыралас. Халтайга, бытархайга бириэмэҕин, күүскүн-уоххун бараама. Ол оннугар нэдиэлэ бүтүүтүн диэки билэр дьонуҥ, доҕотторуҥ көрсүһүүлэргэ ыҥырдахтарына сылдьан сынньан.
Онуоха сулумахтары истиҥ көрсүһүүгэ ыҥырыахтара. Аккаастанымаҥ. Олоҕуҥ аргыһын көрсүөххүн сөп. Дьону-сэргэни да кытары билсиһииҥ кэлин үлэҕэр-хамнаскар туһалаах буолан туруоҕа.
Бырааһынньыкка, хампаанньанан көрсүһүүгэ сырыттаххына, кыраадыстаах утахха чугаһаама, минньигэһинэн үлүһүйүмэ. Уопсайынан аскын-үөлгүн көрүн, тутун.
Сотору кэминэн үпкүн-аскын тупсараргар бэртээхэй этии киириэ.
ИГИРЭЛЭР. Элбэх үбү-харчыны илдьэ сылдьыма. Дьиэҕин-уоккун өрөмүөннүүргэр, улаханы атыылаһаргар харчы наада буолан туруо. Доруобуйаҕын да көрдөрүнэргэр, көлөҕүн да өрөмүөннэтэргэ барытыгар харчы наада буоларын умнубатыҥ ордук.
Тапталлааххар куруук хамаандалыыргын тохтор. Кыратык көҥүл баран ыларын көҥүллээ, ол куһаҕаны оҥоруо суоҕа.
Бу күннэргэ таҥаскын-сапкын халыҥатын. Ордук атаххын сылаастык тут. Тымныйдаххына, тумуу, сөтөл өр ааһан биэрбэккэ эрэйдиэ.
Харчыгын солуута суохха мээнэ матайдаама. Мантан кыһын улахан суолталаахха наада буолан турарын умнубатыҥ ордук. Иэс биэримэ, иэс ылыма.
АРААК. Дьиэҕэр-уоккар чугас дьоҥҥун кытары истиҥник кэпсэт, сүбэлэс. Дьиэтээҕи сорудаҕы кинилэргэ да сүктэрэриҥ сөп буолбут. Ол оннугар бэйэҥ кыратык сынньана, уоскуйа түс. Өрөбүллэргэр ханна эмэ күүлэйдээн кэл. Оттон үлэҕэр күүскэ ылыс. Эрдэ тиий, элбэҕи ситэрэргэ-хоторорго кыһалын.
Чугас доҕоргун кытары истиҥник кэпсэт, ис санааҕын арый. Кини эйигиттэн болҕомто эрэйэрин умнума.
Сылаастык таҥын. Сарсыарда хамсаныы-имсэнии көмөлөөх эрэ буолуоҕа.
Сыраҥ сыаналанан сотору кэминэн бириэмийэ тутуоххун эбэтэр хамнаһыҥ эбиллиэн сөп. Эбэтэр эбии харчылаһаргар этии киириэ.
ХАХАЙ. Таптыыр, сэҥээрэр дьыалаҕынан-куолугунан дьарыктан. Үлэнэн үлүһүйдэххинэ санааҥ-онооҥ да түһүүтүттэн аралдьыйыаҥ. Үлэҥ сүнньүнэн кылгас кэмнээх эбии кууруска да үөрэниэххин сөп. Оттон үлэҕин таһынан тус бэйэҥ сөбүлүүр дьарыктаах буоллаххына, биир интэриэстээхтэргин кытары билис. Ол кэлин да улахан туһалаах буолуоҕар эрэн.
Доҕоргор итэҕэйбэт буолууҥ хаһааҥҥытааҕар да күүһүрбүт. Онтон сылтахтанан куруубайдаан, кыыһыран да туруоххун баҕараҕын. Кубулҕат санааны киэр кыйдыырга сөбүлүүр дьарыгыҥ, киинэҕэ, тыйаатырга сылдьыы көмөлөһүө. Иирсимэ, өр эйэлэһиэххит суоҕа.
Суолга-иискэ тиэтэйимэ. Үөһээ-аллараа хатаастаргар эмиэ сэрэхтээх буол. Уопсайынан, бу нэдиэлэҕэ көрүнэн-истинэн оргууйдук сырыт.
Үпкүн-харчыгын ыһа охсорго тиэтэйимэ. Бытархайы атыылаһыынан үлүһүйүмэ. Ол оннугар уурунан испитиҥ ордук. Кэлин туһалааҕы, улаханы ыларгар балачча үпкэ наадыйан туруоҥ.
КЫЫС. Ону-маны лахсыйаргыттан тутун. Санааҕын туохтан да түһэрбэт буоларга кыһалын. Билигин дьону истэргэр, сыымайдаан, толкуйдаан, ыараҥнатан көрөргөр тоҕоостоох кэм. Элбэҕи иһит, сыаналаа. Нэдиэлэ бүтүүтүн диэки ураты санаалар кутуллан киириэхтэрэ. Олор үлэҕэр да, олоххор да олус туһалаах буолуохтара.
Доҕоруҥ, чугастык саныыр киһиҥ этиитин ыараҥнатан, толкуйдаан көр. Сулумахтар истиҥ көрсүһүүттэн аккаастанымаҥ. Интэриэһинэй кэпсэтии, сонун билсиһии санааны күүһүрдүө, тус бэйэҥ улахан хамсааһыны оҥороргор көдьүүстээх буолуоҕа.
Доруобуйаҕын көрүн. Ордук күөмэйгэр болҕомтоҕун уур. Битэмиин, хамсаныы-имсэнии чэгиэн сылдьаргар тирэх буолуохтара.
Хамнаһын үрдүөн сөп. Маныаха ити боппуруоска сыһыаннаах тоҕоостоох кэми мүччү тутума диэн сулустар сүбэлииллэр.
ЫЙААҺЫН. Бэйэҕэр бүгэн хаалыаххын олус баҕараҕын. Ол эрээри, үлэҕэр, чугас дьоҥҥор эн болҕомтоҥ, сыраҥ олус наада буолан туруохтара. Тыл ыһыктыбакка, аккаастаммакка түһүнэн, көмөлөһөн испитиҥ ордук буолуо. Сотору көмөҥ, болҕомтоҥ сыаналаныа.
Доҕотторуҥ көрсүһүүгэ ыҥырдахтарына аккаастаныма. Сонун билсиһии эйиэхэ элбэҕи биэриэҕэ, үлэҕэр туһалаах сүбэлэри-амалары истиэҥ.
Сибиэһэй салгыҥҥа оргууйдук хаамп, хамсан-имсэн. Ол-бу сурахха-садьыкка уолуһуйума, ньиэрбинэйдээмэ. Ааһар албыҥҥа итэҕэйимэ.
Үпкүн-харчыгын барыы, ону-маны атыылаһа охсорго тиэтэйимэ. Өрөбүллэргин дьиэҕэр атаар. Түүлгэр болҕомтоҕун уур.
СКОРПИОН. Үлэ-хамнас, түбүк-садьык олус элбиэҕэ. Барытын кэмигэр бүтэрэргэ, түмүктүүргэ кыһалын. Сылааҕын хамсанан-имсэнэн аһарарга дьулус. Бииргэ үлэлиир дьоҥҥор истибит сонуҥҥун кэпсээмэ. Туора кэпсэтиигэ мээнэ кыттыһыма.
Тапталлааххар болҕомтоҕун уур, кинини кытары истиҥ кэпсэтииҥ, санааҕын аһаҕастык этииҥ сыһыаҥҥытын тупсарыа.
Өрөбүллэргэр бэйэҕин көрүн. Бассейнҥа сырыт, хамсан-имсэн. Иҥэмтиэлээх, битэмииннээх аска болҕомтоҕун уур. Таҥаскын-сапкын бэрий.
Нэдиэлэ ортотуттан саҕалаан ону-маны атыылаһаргын тохтотон эрэриҥ ордук буолуо. Бу күннэргэ элбэх киһи мустар сиригэр уһуннук тохтуу сатаама.
ОХЧУТ. Дьиэҥ-уотуҥ өрөмүөнүгэр сыта-тура толкуйдаан баран ылыс. Санааҕын-онооҕун онно уур. Атыҥҥа аралдьыйаргын тохтот. Ньиэрбинэйдээн дьоҥҥун кытары кыыһырсаргыттан соло булуоҥ суоҕа. Билигин иирсибиккит өр соһуллан эрэйдиэ. Онон бириэмэттэн бириэмэтигэр көрөн уоскулаҥна, сынньалаҥна тэрин. Бэйэҕин көрүн.
Чугас доҕоруҥ, тапталлааҕыҥ эн этиигин ылыныа, өйдүө. Ол гынан баран, түүлгүн киниэхэ да, чугас дьоҥҥор да кэпсии охсорго тиэтэйимэ. Ыраахтан үтүө сонун истиэҥ.
Үлэҕин-хамнаскын көрөн күннэринэн аттар. Аһары сыралаһыыҥ, сынньаммакка үлэлээһиниҥ доруобуйаҕын алларытыан сөп.
Үп-харчы тупсуо. Эбэтэр эбии харчылаһаргар этии киириэ.
ЧУБУКУ. Бу нэдиэлэҕэ санаабытыҥ сатанан, туолан иһэринэн сөхтөрүө. Онон мөкүнү, куһаҕаны ордук бу күннэргэ санааҕар төрүт чугаһатыма даҕаны. Туолан хааларын ааһан, тус бэйэҕэр уон оччонон кэлин күүһүрэн кэлэр диэни умнума. Үлэҕэр-хамнаскар бириэмэҕин тутус, сөптөөҕүнэн көрөн үлэлээ. Уоппуска, сынньалаҥ күнү ыларыҥ өссө үчүгэй буолуоҕа. Дьиэҕэр-уоккар чугас дьоҥҥун кытары алтыс.
Сулумахтар бу күннэргэ олохторун аргыһын көрсүөхтэрин сөп. Онон доҕотторгут ыҥырар истиҥ көрсүһүүлэриттэн аккаастанымаҥ. Элбэх киһи тоҕуоруһар сиригэр сылдьа сатааҥ.
Сөптөөх хамсаныы-имсэнии, сибиэһэй салгыҥҥа хаамыы доруобуйаҕар туһалаах эрэ буолуохтара. Эминэн үлүһүйэргэ тиэтэйимэ, ол оннугар аска-үөлгэ болҕомтоҕун уур.
Үпкүн-харчыгын уурун. Кэлин дьиэҕэр-уоккар улаханы атыылаһаргар наада буолан туруон сөп.
КҮРҮЛГЭН. Үлэҕинэн эрэ үлүһүйүмэ. Кыһалыннаххына хаһан баҕарар ситэриэҥ-хоторуоҥ. Ол оннугар тыйаатырга, киинэҕэ, кэнсиэргэ сырыт, аралдьыйа түс. Аҕам саастаах аймахтаргар болҕомтоҕун уур. Өрөбүллэргэр дьиэҕин-уоккун хомун, бэрээдэктэн, кыстыкка бэлэмнэн.
Сотору кэминэн таптыыр доҕоргун көрсүөххүн сөп. Өскөтүн бэйэҥ көрсүөххүн, кэпсэтиэххин, быһаарсыаххын баҕарар буоллаххына. Сулустар онно көмөлөһөргө бэлэмнэр. Ыраахтан үчүгэй сонун истиэҥ.
Доруобуйаҕын көрдөрүн, чэбдигирдин. Өрөбүллэргэр сибиэһэй салгыҥҥа сырыт.
Үп-харчы боппуруоһугар уларыйыы суох.
БАЛЫКТАР. Тулалыыр доҕотторгуттан бу күннэргэ элбэх сонуну истиэҥ. Ол гынан баран, онно тус санааҕын аһаҕастык үллэстэргэ тиэтэйимэ. Түүлгүн-биккин дьоҥҥо ыһа-тоҕо кэпсээмэ. Сотору кэминэн туох барыта оннун-сүнньүн булан барыа.
Сынньалаҥҥын чугас дьоҥҥун кытары атаарарга кыһалын. Истиҥ кэпсэтии тус бэйэҕэр элбэҕи биэриэҕэ. Соһуччу урукку доҕоргун, дьүөгэҕин көрсөн улаханнык долгуйуоҥ.
Доруобуйаҕар болҕомоҕун уур. Быраастарга сырыт, ол эрээри, хамсанартан-имсэнэртэн, сибиэһэй салгыҥҥа сылдьартан аккаастаныма.
Нэдиэлэ саҥатыгар соһуччу үп-харчы тутуоххун сөп.