ХОЙ. Түбүк-садьык элбиир күнэ-дьыла үүммүт. Үксэ үбү-харчыны, докумуоннары кытары сибээстээх буолуохтара. Онон үлэҕэр барытын эрдэттэн толкуйдаан былаанна оҥоһун.
Сулумахтары билсиһии, истиҥ көрсүһүү күүтэр. Ол эрээри майгыгын-сигилигин көрүнэ сылдьаргар, сымнаһыар буоларгар сулустар сүбэлииллэр. Толкуйгун, санааҕын искэр тутан эр дииллэр. Бу күннэргэ дьиэҕэр, үлэҕэр эбэтэр уулуссаҕа көһүппэтэх өртүгүттэн соһуччу үчүгэй туох эрэ күүтэр. Санааҥ-онооҥ онтон улаханнык көтөҕүллүө.
Хамсаныы-имсэнии доруобуйаҕар туһалаах эрэ буолуо. Онон, баҕар, эрчиллэр саалаларга сырыт, бассейнҥа сөтүөлээ. 15-с чыыһыла эйиэхэ үчүгэйи түстүүр. Оттон 18-с чыыһылаҕа ыраах барыма-кэлимэ диэн сулустар сүбэлииллэр.
ОҔУС. Тугу эрэ оҥоруоҥ, саҕалыаҥ иннинэ, сыта-тура толкуйдаа. Урут ситэрбэтэххин ситэрэргэр, оҥорботоххун оҥороргор табыгастаах күннэри мүлчү тутума.
Нэдиэлэ бүтүүтүгэр онно-манна аралдьыйыаххын баҕарыаҥ. Ол эрээри, кэллиэгэлэргин, билсэр дьоҥҥун кытары мээнэ оонньоһума, көргө-нарга охтума. Түргэнник улдьаарыаххын сөп диэн сулустар этэллэр. Ол-бу үһү-тамах кэпсээннэргэ кыттыһыма. Ордук кэллиэгэлэриҥ, салайааччыҥ туһунан кэпсэтиигэ чугаһаама.
Сулумах сылдьааччылар сүрэхтэрин аҥаарын көрсүөхтэрин сөп. Нэдиэлэ бүтүүтүгэр истиҥ көрсүһүүгэ ыҥырыахтара. Онтон аккаастаныма. Түүлгэр, сэрэйэн көрөр дьоҕургар болҕомтоҕун уур. Эйиэхэ бу ыйга ордук 14 чыыһыла үчүгэйи, ситиһиини тосхойор.
ИГИРЭЛЭР. Бу күннэргэ тус олоҕуҥ туһуттан улаханнык долгуйуоҥ. Тапталлааҕыҥ болҕомтото эйиэхэ тиийбэт курдук буолуо. Ол-бу санаалар да кииртэлиэхтэрэ. Ол эрээри, бэйэҕин кыатана тутун. Быһаччы быһаарыылары оҥорума диэн сулустар сүбэлииллэр. Тиэтэйбэтэххинэ, барыта оннун-сүнньүн булуо.
Үлэҕэр-хамнаскар ситиһиилэниэҥ. Улахан сыалгын-соруккун олоххо киллэриэҥ. Хас да күнү турунан үлэҕэр аныырыҥ ирдэнэр. Оччоҕуна толкуйдаабытыҥ тобуллуо, ылсыбытыҥ ыпсан иһиэ.
Нэдиэлэ иккис аҥаарыгар харчыгын иэс биэримэ, кимтэн да иэһээмэ. Ый 17-с күнэ эйиэхэ үчүгэй. Нэдиэлэ бүтэүик күнүгэр элбэх киһи тоҕуоруһар сиригэр сылдьа сатаама.
АРААК. Олус бэртээхэй нэдиэлэ үүммүт. Үлэҥ, сынньалаҥыҥ бука барыта санааҥ хоту салаллыа. Элбэх дьыаланы-куолуну ситиһиэҥ. Ол эрээри, үлэҕэр куруук сэргэх буол. Ыраах айаҥҥа барыаххын сөп. Ол интэриэһинэй, сонун бырайыагы кытары сибээстээх буолуоҕа. Аккаастаныма. Онно айаныҥ эйиэхэ ситиһиилэри тосхойуо.
Чугас доҕоргун кытары уопсай тылы буларга, өйдөһөргө кыһалын. Оттон кэргэннээхтэр сыһыаҥҥыт тымныйбыт курдук буолуон сөп. Оннук санаа киирэр да түгэнигэр, холку буоларга кыһалын, уоскуй. Оччоҕуна барыта оннун-сүнньүн булан барыа.
Дьиэҕэр-уоккар сыһыаннаах боппуруостары нэдиэлэ бүтүүтүгэр быһаар. Таҥаскын-сапкын, баттаххын, сэбэрэҕин көрүн. Өрөбүлгэ доҕотторгун кытары көрүс. Ый ортотугар эйиэхэ олус үчүгэй күннэр үүнүөхтэрэ.
ХАХАЙ. Бу күннэргэ үпкэр-харчыгар улахан болҕомтоҕун уур, ааҕына-суоттана сырыт. Интэриниэтинэн атыыласпыттаах буоллаххына, оно болҕомтоҕун уур.
Нэдиэлэ иккис аҥаара үлэҕэр баар боппуруостары быһаараргар тоҕоостоох. Ууран сытыарбыт дьыалаҕын-куолугун сөргүт, ситэр. Саҥаны хаһааныма. Барытын кэмигэр түмүктүүргэ кыһалын. Ону салалтаҥ кэлин бэлиэтии көрүө.
Дьиэҕэр киһилии тохтоон сынньамматаҕыҥ, чугас дьоҥҥун кытары бириэмэҕин атаарбатаҕыҥ ырааппыт. Онон дьонуҥ эн болҕомтоҕор наадыйалларын умнума. Истиҥник кэпсэт, ханна эмэ бииргэ бара сырыт. Өрөбүллэргин кинилэри кытары атаар. Аһылыккар болҕомтоҕун уур. Халыҥнык таҥнан-симэнэн сырыт. Бу күннэргэ ыраахтан үчүгэй сонуну истиэҥ. Оттон оптуорунньук эйиэхэ үөрүүнү бэлэхтиэ.
КЫЫС. Бу нэдиэлэҕэ бэйэ бодоҕун күүскэ тардынан, бириэмэҕин аттарынан сырыт. Ол-бу туһата суох сэлэһиигэ бириэмэҕин бараама, үлэ кэнниттэн онно-манна сынньана барыма. Көннөрү билсэр дьоҥҥор араас сонуну истибиккин кэпсээмэ. Сыалла-сорукта туруорунан, былаанна оҥостон бараҥҥын, бу күннэргэ ону көрө сылдьан толорон иһэргэ кыһалын. Нэдиэлэ иккис аҥаарыгар онно-манна айанныыртан аккаастаныма.
Дьиэҕэр-уоккар, бэйэҕэр туох эрэ туһалааҕы, наадалааҕы, улаханы атыылаһыаххын сөп. Атыыласпыккыт өр сулууспалыа. Ыраахтан кэһии тутуоҥ эбэтэр көрсүбэтэҕиҥ ырааппыт доҕоруҥ ыалдьыттыы кэлиэҕэ. Бу ый 19-с күнэ эйиэхэ ситиһиини, үчүгэйи тосхойор.
ЫЙААҺЫН. Бу күннэргэ сулумахтар тус олохторугар сыһыаннаах уларыйыы-тэлэрийии бөҕөтө күүтэр. Истиҥ билсиһииттэн саҕалаан, умнуллубат көрсүһүүлэргэ, күүстээх тапталга тиийэ көрсүөххүт диэн сулустар билгэлииллэр. Ол да буоллар аҕам саастаах аймахтаргыт туһунан умнума. Кинилэри кытары көрүс, кэпсэт, билис. Өрөбүллэргитин бииргэ да атаарыаххытын сөп. Кинилэр этиилэрэ олоххор туһалаах буолуохтара.
Нэдиэлэ бастакы аҥаара дьыалабыай көрсүһүүгэ олус үчүгэй. Эн этииҥ өйөбүлү ылыан, эбэтэр дуоһунаһыҥ үрдүөн сөп. Элбэх харчыны тутуоҥ эбэтэр эбии харчылаһаргар кыах үөскүө.
Өрөбүллэргэр урукку былааҥҥын олоххо киллэрэргэ дьулус. Дьиэҕэр-уоккар эбэтэр тус бэйэҕэр тугу эрэ атыыласпытыҥ санааҕын улаханнык көтөҕүө. Бээтинсэ күн онно-манна улдьаарыма, хойутаама. Оттон ый 19-с күнэ эйиэхэ үөрүүнү бэлэхтиэ.
СКОРПИОН. Бу нэдиэлэҕэ түбүк-садьык олус элбиэҕэ. Үлэҥ таһынан кытары түбүгүрүөҥ. Ону салалтаҥ бэлиэтиэҕэ. Дуоһунаһыҥ үрдүө, ол хамнаскар да биллиэҕэ.
Дьиэҕэр-уоккар улаханы атыылаһар былааннааххын бу нэдиэлэҕэ толордоххуна, бэйэҕэр махтанаргыттан соло булуоҥ суоҕа. Өр сулууспалыа. Ол гынан баран, сулустар бу күннэргэ харчыны иэс ылбаккар сүбэлииллэр. Ууруммут харчыгын тутун дииллэр.
Өрөбүллэргин чугас дьоҥҥун кытары атаар. Доруобуйаҥ туһунан умнума. Таҥаскын-сапкын көрүн, битэмииннээх, иҥэмтиэлээх аска болҕомтоҕун уур. Сулумахтары истиҥ билсиһии күүтэр. Онон доҕотторуҥ, билэр дьонуҥ көрсүһүүгэ ыҥырдахтарына аккаастаныма. Түүлгүн дьоҥҥо ыһа-тоҕо кэпсээмэ. Нэдиэлэ бүтүүтэ саҥа билсиһиигэ олус үчүгэй күн.
ОХЧУТ. Туох баар үлэҕин-хамнаскын, дьыалаҕын-куолугун, хаалларан, умнан-тэмнэн сытыарбыккын барытын бу нэдиэлэҕэ үмүрүтэргэ кыһалын. Тоҕо диэтэххэ, кэллиэгэлэриҥ, салалтаҥ кэлин эйиэхэ итинтэн сылтахтанан итэҕэйбэт буолан туруохтарын сөп. Онон ордук улахан болҕомтоҕун үлэҕэр уур.
Уопсайынан бу нэдиэлэни үлэҕэр, чугас дьоҥҥор эрэ анаа. Саҥа билсиһиилэр эйиэхэ туох да түмүгү аҕалыахтара, үлэҕэр көмөлөһүөхтэрэ суоҕа.
Өрөбүллэргин чугас дьоҥҥун кытары атаар. Ыраах айантан аккаастан. Сэрэйэн көрөр дьоҕуруҥ хаһааҥҥытааҕар да күүһүрбүт.
Үп-харчы дьыалата уруккутунан. Оттон үлэ көрдөөччүлэргэ үчүгэй күннэр үүммүттэр. Ордук бу ый 14-15 күннэрэ итиннэ көмөлөөх буолуохтара.
ЧУБУКУ. Тугу оҥоруохтааххын былааннаатаххына табыллыа. Үлэҕэр-хамнаскар бэрээдэктэн. Хаалларан сытыарбыккын ситэр-хотор.
Бу күннэргэ айаныҥ табыллыа. Элбэх киһини кытары билсиэҥ, саҥа доҕоттордонуоҥ. Ол быыһыгар, сулумахтары интэриэһинэй билсиһии күүтэр. Хамсан-имсэн, доруобуйаҕын көрүн. Үөһээттэн күүс-уох кутуллан киирэр курдук буолуоҕа.
Хайдахтаах да үчүгэйдик сынньаммытыҥ иһин, үпкүн-харчыгын өйдөөхтүк-төйдөөхтүк ааҕан-суоттаан тутун. Бу күннэргэ ыраахтан ыалдьыттар кэлиэхтэрин сөп, эбэтэр кэһии тутуоҥ, үчүгэй сонуну истиэҥ. Түүлгэр болҕомтоҕун уур. Ый 18 чыыһылата эйиэхэ табыллыыны түстүүр.
КҮРҮЛГЭН. Бу нэдиэлэ эйиэхэ олус үчүгэй. Нэдиэлэ иккис аҥаарыттан саҕалаан саҥа, истиҥ көрсүһүүлэр элбиэхтэрэ. Олор үлэҕэр үчүгэйи аҕалыахтара. Сулумахтар урукку тапталгытын көрсүөххүтүн сөп. Ол да буоллар, нэдиэлэ саҥатыгар улахан болҕомтоҕун үлэҕэр уур. Сыалгын-соруккун, былааҥҥын сааһылаа.
Үп-харчы боппуруоһа тупсуо. Бириэмийэ ылыаххын эбэтэр эбии харчылаһар кыах үөскүөн сөп.
Түүлгүн дьоҥҥо кэпсээмэ. Сэрэйэн көрөр дьоҕургар болҕомтоҕун уур. Ыраахтан кэһии тутуоҥ. Субуотаҕа эйиэхэ үөрүү тосхойуо.
БАЛЫКТАР. Нэдиэлэ бастакы аҥаарыгар үпкэ-харчыга ыктарыаҥ. Ол эрээри ыксаама, ыгылыйыма. Нэдиэлэ ортотугар ити боппуруос кыаллыа, быһаарыллыа. Харчылаһаргар туораттан этии киириэн сөп. Оттон үлэҕэ сыһыаннаах этии киирдэҕинэ, аккаастаныма. Эппиэтинэһи бэйэҕэр ылын.
Бу күннэргэ саҥаны саҕалаабыккын ситиһиэҥ. Онуоха табыгастаах күннэр үүммүттэр. Нэдиэлэ бүтүүтүгэр ханна эрэ айанныаххын да сөп. Ол эйиэхэ туһаны аҕалыа.
Өрөбүллэргин бэйэҕэр анаа. Астына-дуоһуйа сынньан. Чугас дьоҥҥун кытары истиҥник кэпсэт, ханна эмэ бииргэ бара сырыт. Бу ый 20-с чыыһылата эйиэхэ үчүгэйи түстүүр.