САХАЛЫЫ ГОРОСКОП. АХСЫННЬЫ 9-15 КҮННЭРЭ

Ааптар: 
Бөлөххө киир:

ХОЙ. Бу нэдиэлэҕэ тугу ситиһэриҥ, тугу оҥороруҥ бэйэҕиттэн тутулуктаах. Күүстээх санаалаах, дьулуурдаах буолуоххун эрэ наада. Чугас дьонуҥ, дьиэ кэргэниҥ бэйэлэрин санааларын хоту сылдьалларын утарыма. Оччоҕуна сыһыаҥҥыт тупсуо.

Үлэҕэр элбэх түбүк-садьык баар буолуо. Ордук нэдиэлэ саҥатыгар. Ол гынан баран, ситиһии эйиигин кыйа көппөт. Онуоха үлэҕин-хамнаскын, бэриллибит сорудаҕы тус бэйэҥ эрэ толорорго суоттан. Атыттарга, туора дьоҥҥо эрэнимэ. Түһэн биэриэхтэрин сөп.

Доруобуйаҥ туһунан умнума. Ордук тымныйыыттан сэрэн. Таҥаскын-сапкын бэрий, аскын-үөлгүн көрүн.

ОҔУС. Нэдиэлэтээҕи түбүктэн-садьыктан түргэн-тарҕан туттунуулаах буоллаххына өрүһүнүөҥ. Туора дьон ол-бу халы-мааргы тылларыттан өһүргэнимэ. Элбэх кинигэтэ аах, билиигин-көрүүгүн хаҥатынарга дьулус. Ол туһалаах эрэ буолуоҕа.

Ордук бу күннэргэ үлэҕэр улахан болҕомтоҕун, кыһамньыгын уурарыҥ ирдэнэр. Онуоха нэдиэлэтээҕи былааны оҥостууҥ сорудаҕы ситэрэргэр-хотороргор көмөлөөх буолуо. Оттон ылбыт билииҥ-көрүүҥ үлэҕэр наада буолан туруо.

Өрөбүллэргин дьиэҕэр-уоккар туһалаахтык атаар. Чугас дьоҥҥор көмөлөс.

ИГИРЭЛЭР. Нэдиэлэтээҕи үлэҕин-хамнаскын сиһилии былааннаа. Сорудаҕы уһаппакка-кэҥэппэккэ тута толорон иһэргэ кыһалын. Кэлэр күннэр-дьыллар тустарынан толкуйдаа. Өрөбүллэргин туһалаахтык атаарарга суоттан.

Үлэҥ-хамнаһыҥ, үбүҥ-харчыҥ боппуруоһа тупсар чинчилээх. Ол гынан баран, үпкүн-харчыгын ыһа-тоҕо, барыы охсорго, тугу эмэ атыылаһарга тиэтэйимэ. Соһуччу көрсүбүт доҕотторуҥ санааҕын-онооҕун улаханнык көтөҕүөхтэрэ, ол үлэҕэр эрчими биэриэ, саҥа, сонун санааны саҕыа.

Дьиэҕин-уоккун өрө тардыыҥ чугас дьоҥҥун кытары сыһыаҥҥын тупсарыа. Илэ-эйэ олохсуйуо.

АРААК. Эрдэ туран-олорон сырыттаххына, түргэн-тарҕан буоллаххына, ордук нэдиэлэ саҥатыгар элбэҕи ситиһиэҥ. Ол дьиэҕэр-уоккар, тус бэйэҕэр, үлэҕэр да буолуон сөп. Кылаабынайа барытын сыта-тура толкуйдаан, былаанынан хардыылаа диэн сүбэлииллэр.

Үлэҕэр көстүбүт түбүгү-садьыгы кэмигэр быһааран, ситэрэн-хоторон иһэргэ дьулус. Элбэх кэпсэтииттэн, дьыалабыай көрсүһүүттэн тус бэйэҕэр элбэх билиини-көрүүнү эбиниэҥ. Ол үлэҕэр сонуну киллэрэргэр тирэх буолуоҕа.

Өрөбүллэргин дьиэҕэр-уоккар, чугас дьоҥҥун кытары атаарарыҥ ордук. Кэлэн иһэр бырааһынньыкка толкуйдаахтык бэлэмнэн.

ХАХАЙ. Санааҥ-онооҥ, настарыанньаҥ бу күннэргэ уларыйа-тэлэрийэ сылдьыа. Оттон сөптөөх хамсаныы-имсэнии, хаамыы-сиимии доруобуйаҕар, санааҕын көтөҕөргөр туһалыахтара. Нэдиэлэ бүтүүтэ ыраахтан ыалдьыттар кэлиэхтэрин сөп эбэтэр кэһии тутуоҥ.

Бу күннэргэ үлэ-хамнас, түбүк-садьык балачча элбиэҕэ. Сордуаҕы толороргун сарсыҥҥыга көһөрө сатаама. Бэйэҥ күүскэр-кыаххар эрэн. Атыттарга көлбөрүтүмэ. Санааҥ хоту оҥоруохтара суоҕа эбэтэр төрүт да сорудаҕы оҥорбокко эйиигин түһэн биэриэхтэрин сөп.

Бу күннэргэ элбэх үп-харчы наада буолан туруон сөп. Баҕар дьиэҕэр-уоккар наадалаах тугу эрэ атыылаһыаҥ.

КЫЫС. Нэдиэлэ көрсүһүүлэринэн, саҥа, сонун билсиһиилэринэн толору. Сулумах сылдьааччылар олохторун аргыһын да көрсүөхтэрин сөп. Сэрэйэн көрөр дьоҕуруҥ күүһүрбүт. Бу күннэргэ тугу оҥоруохтааххын былааннаа. Оччоҕо оннун-сүнньүн булан иһиэ.

Үлэҕэр болҕомтоҕун уур. Быраҕан сытыарбыт, умнубут, кэнникигэ хаһааммыт үлэҕин түмүктүүргэ кыһалын. Кэллиэгэлэргин кытары ол-бу сэлэһиигэ кыттыһыма. Тус санааҕын аһаҕастык үллэстимэ, кимиэхэ да кэпсээмэ.

Дьиэҕэр-уоккар эн өйөбүлгэр наадыйаллар. Онон өрөбүл күннэри чугас дьоҥҥун кытары атаарарга кыһалын.

ЫЙААҺЫН. Бу күннэргэ санааҥ-онооҥ уларыйа-тэлэрийэ сылдьыаҕа. Үлэҕэр, дьиэҕэр, тус бэйэҕэр бэрээдэктэнии, ыраастаныы үлэтин ыытаргар сулустар сүбэлииллэр. Оччоҕуна суолуҥ арыллыа, настарыанньаланыаҥ, ситиһииэлэниэҥ диэн этэллэр.

Ордук бу күннэргэ бириэмэҕин тутуһан бара-кэлэ сырыт. Үлэҕэр көхтөөххүн көрдөрөргө кыһалын. Саҥа, сонун үлэҕэ-хамнаска түсүһэн ис. Кэллиэгэлэргэр болҕомтоҕун уур, көмөлөс, сүбэтэ-амата биэр. Үп-харчы боппуруоһугар уларыйыы суох.

Истиҥ көрсүһүүгэ ыҥырдахтарына аккаастаныма. Сулумахтары бэртээхэй билсиһии күүтэр.

СКОРПИОН. Майгыгын-сигилигин туттунарга кыһалын. Дьону-сэргэни кытары иирсииҥ өйгүттэн-санааҕыттан ааһан-араҕан биэрбэккэ эрэйдиэ. Доруобуйаҕар да охсуулаах буолуоҕа. Ол оннугар сибиэһэй салгынынан тыынарга, хамсанарга-имсэнэргэ кыһалын.

Үп-харчы боппуруоһугар уруккуттан уларыйыы тахсыа суоҕа. Ол оннугар түбүк-садьык хаһааҥҥытааҕар да элбээн туруоҕа. Сыспакка-соспокко, атыттарга көлбөрүппэккэ, сорудахтан аккаастаммакка барытыгар түһүспүтүҥ ордук буолуо.

Дьиэҕэр-уоккар болҕомтоҕун уур. Чугас дьоҥҥун кытары истиҥник сэһэргэс. Ордук аҕам саастаахтар эн болҕомтоҕор наадыйалларын умнума.

ОХЧУТ. Туохтан барытыттан бүгэн хаалыах санааҥ кэлэр. Онуоха ордук бу күннэргэ дьону-сэргэни кытары өйдөспөт буолууҥ элбээбит. Туора дьон саҥарарын, кириитикэтин тулуйан иһит. Оччоҕуна нэдиэлэ бүтүүтэ туох барыта намырыйыа.

Ыраах айаннаама. Олус элбэх киһи мустар тэрээһинигэр сылдьа сатаама. Ол оннугар үлэҕин-хамнаскын үмүрүтэргэ болҕомтоҕун уур. Эбии харчылаһаргар этии киириэн сөп. Саҥа билсиһиилэр үлэҕэр сонун сүүрээни киллэрэргэр көмөлөөх буолуохтара.

Өрөбүллэргин тус бэйэҕэр анаа. Доруобуйаҕар болҕомтоҕун уур, билиигин хаҥат, сөптөөх хамсаныыта-имсэниитэ оҥор.

ЧУБУКУ. Бу нэдиэлэҕэ кимниин да иирсибэт буола сатаа. Ол туһуттан наар үчүгэйи толкуйдаа, үтүө сонуҥҥа болҕомтоҕун уур, настарыанньаҕын көтөҕөр тугу эмэ атыылас эбэтэр астаа. Кими эмэ ситиһиитинэн эҕэрдэлээ.

Үлэҕэр болҕомтоҕун уур. Кэллиэгэлэриҥ эн көмөҕөр наадыйдахтарына, өйөбүл буол, көмөлөс. Сорудаҕы да уталыппакка толорорго кыһалын. Сарсыардатын эрдэлээ. Саҥа, сонун санааҕын, былааҥҥын олоххо киллэрэргэ кыһалын.

Доҕотторгун кытары көрсүһүүттэн аккаастаныма. Сулумахтары интэриэһинэй билсиһии күүтэр.

КҮРҮЛГЭН. Туохха барытыгар хайдах баарынан сыһыаннас. Оттон дьон-сэргэ, бииргэ үлэлиир дьонуҥ эн көмөҕөр, сүбэҕэр наадыйдахтарына аккаастаныма. Оччоҕуна бу нэдиэлэ эйиэхэ ситиһиилэри тосхойуо.

Бу күннэргэ эбии харчылаһар кыах үөскүөн сөп эбэтэр улахан уонна кэскиллээх дьыалабыай кэпсэтиигэ кыттыаҥ. Онуоха нэдиэлэ саҥа билсиһиилэринэн толору. Олор эйиэхэ күүһү-уоҕу биэриэхтэрэ, эбии билиини-көрүүнү дабайаргар тирэх буолуохтара.

Өрөбүллэргин дьиэҕэр атаар. Дуоһуйа сынньан. Оттон сөптөөх хамсаныы-имсэнии доруобуйаҕар туһалаах буолуо.

БАЛЫКТАР. Бу күннэр сонун көрсүһүүлэринэн, саҥа билсиһиилэринэн толорулар. Олортон санааҥ-онооҥ көтөҕүллүө, күүс-уох үөһэттэн кутуллан киирэр курдук буолуоҕа. Чугас дьонуҥ, дьиэҥ-уотуҥ туһунан умнума. Кылаабынайа тэрийэр дьоҕургар эрэн.

Ханна эмэ баран кэлииҥ туһалаах буолуоҕа. Онуоха саҥа үлэ миэстэтин көрдөөччүлэргэ үчүгэй, быйаҥнаах кэм үүммүт. Маныаха өрдөөҕүттэн билэр дьонуҥ эбэтэр аҕам саастаах аймахтарын этиилэригэр болҕомтоҕун уур.

Чугас дьоҥҥор, дьиэ кэргэҥҥэр болҕомтоҕун уур. Өрөбүллэргэр дьиэҕэр-уоккар туһалаах дьыаланан дьарыктан.

+1
0
+1
0
+1
0
+1
0
+1
0
+1
0
+1
0