Сахалыы дьыктааны түөрт тыһыынчаҕа чугаһыыр киһи суруйда

Ааптар: 
Бөлөххө киир:

Национальнай бибилэтиэкэ уонна ХИФУ, олунньу 13 күнүгэр, Төрөөбүт тыл уонна сурук-бичик күнүгэр, ахсыс төгүлүн сахалыы дьыктааны суруйууну тэрийдилэр. 

Тэрээһиҥҥэ түөрт тыһыынчаҕа чугаһыыр киһи кытынна. Суруйуу олоҕурбут көрүҥүнэн бибилэтиэкэҕэ биэс былаһаакканан ыытылынна. Дьыктааны бибилэтиэкэ үлэһиттэрэ — национальнай-кыраайы үөрэтэр пуонда салаатын сэбиэдиссэйэ Лариса Кычкина, сүрүн бибилэтиэкэр Виктория Ильина, ХИФУ преподавателлэрэ — университет Хотугулуу-Илиҥҥи норуоттар тылларын уонна култуураларын үөрэтэр институт саха тылыгар хаапыдыратын сэбиэдиссэйэ Дария Чиркова, филология наукатын кандидата Анастасия Шамаева аахтылар. Дьыктаан аан бастакытын онлайн киэбинэн ыытылынна.

Онлайн-дьыктаан кыттыылаахтара биир нэдиэлэнэн бибилэтиэкэ саайтыгар суруйбут тиэкистэрэ таҕыстаҕына, үлэлэрин бэрэбиэркэлиир кыахтаныахтара,

«Сахалыы дьыктаан» аахсыйатыгар барыта 3 855 киһи кытынна. Итинтэн 32 киһи дьыктааны национальнай бибилэтиэкэҕэ суруйда. 3380 киһи бибилэтиэкэ ситимнэригэр: өрөспүүбүлүкэ 30 улууһугар 200 былаһаакка тэриллибитэ. Онлайн-дьыктааны 411 киһи Youtube-ханаалынан уонна бибилэтиэкэ официальнай саайтыгар киирэн суруйда.

«Сахалыы дьыктаан» аахсыйатыгар үгэс курдук араас саастаах, араас идэлээх дьон кытталлар. Холобур, быйылгы тэрээһиҥҥэ оскуола үрдүкү кылааһын үөрэнээччитэ, «Якутия» АК стюардессата, кадаастыр палаататын эдэр исписэлииһэ, уо.д.а. бааллар. Кинилэр дьыктааны бибилэтиэкэҕэ суруйар ордугун бэлиэтээтилэр«, — диир Лариса Кычкина.

Дьыктаан тиэкиһэ Саха сирин норуодунай суруйааччыта Софрон Данилов «Сүрэх тэбэрин тухары» айымньытыттан ылыллыбыт.

Дьыктааны олоҕурбут көрүҥүнэн суруйууга кыттыбыт дьон үлэтин бастаан бэрэбиэркэлиэхтэрэ уонна нэдиэлэ иһинэн национальнай бибилэтиэкэҕэ аҕалыахтара.

Сахалыы дьыктаан 2014 сылтан ыытыллар. Көҕүлээччилэр, тэрийээччилэр уонна ааптардар — ХИФУ Хотугулуу-Илиҥҥи норуоттар тылларын уонна култуураларын үөрэтэр институт уонна СӨ национальнай бибилэтиэкэтэ СӨ Култууратын уонна духуобунай сайдыыга министиэристибэтин өйөбүлүнэн ыытыллар.

+1
0
+1
0
+1
0
+1
0
+1
0
+1
0
+1
0