Олунньу 15 күнүгэр, күнүс 13 чаастан, Дьокуускай куорат Национальнай бибилэтиэкэтин ааҕар саалатыгар Тыл күнүнэн, үгэс быһыытынан ыытыллар сахалыы дьыктаан буолуоҕа.
edersaas.ru
Сэттис төгүлүн ыытыллар сахалыы дьыктааны СӨ култууратын, духуобунай сайдыытын миниистирэ Юрий Куприянов, “Саха” НКХ ыытааччыта Эдуард Рудых, кэрэспэдьиэнэ Руслана Максимова уонна Дьокуускай куорат 26 №-дээх оскуолатын саха тылын уонна литэрэтиирэтин учуутала Марианна Борисова ааҕыахтара. Дьыктаан түмүгэ олунньу 20 күнүгэр тахсыаҕа. Үчүгэй үлэлэр ХИФУ, П.А. Ойуунускай аатынан Саха тыйаатырын, “Бичик” кинигэ кыһатын уонна РНА ХС ГЧИ бириистэринэн наҕараадаланыахтара. Тэрийээччилэр аахсыйа кыттыылаахтарыгар уруучукаҕытын умнумаҥ диэн көрдөһөллөр.
Куорат оскуолаларын саха тылын уонна литэрэтиирэтин учууталларын холбоһугун салайааччыта Марианна Борисова быйылгы дьыктаан туһунан маннык кэпсээтэ:
—Дьыктаан тиэмэтэ үбүлүөйдээх суруйааччыбыт Н. Д. Неустроев айымньыларынан буолуоҕа. Дьыктааны үһүс төгүлүн ааҕабын. Сыл аайы дьон көхтөөхтүк кыттар. Дьыктаан суруйа кэлээччилэргэ сурук бэлиэтин быраабылаларын көрүнэн, аахтан, хатылаан кэлэллэригэр сүбэлиибин. Ордук эбэтэр турбакка хаалбыт сурук бэлиэтэ эмиэ сыыһанан ааҕыллар.
Сахалыы дьыктааҥҥа кыттыҥ, бэйэҕит кыаххытын тургутан көрүҥ!
Ньургуйаана Иванова, «Саха сирэ» хаһыат, edersaas.ru
Хаартыска интэриниэт ситимиттэн