Соторутааҕыта социальнай ситимнэргэ “Саха” Национальнай көрдөрөр-иһитиннэрэр хампаанньа (НКИХ) суоппардара уонна тиэхиньиктэрэ Сахалин уобалаһыгар ыытыллар “Азия оҕолоро” I Норуоттар икки ардыларынааҕы кыһыҥҥы оонньуулары сырдатыыга айаҥҥа туруммуттарын туһунан тарҕаммыта.
edersaas.ru
Биһиги хампаанньа салайааччыта Олег Марковы кытта көрсөн, бу суолталаах тэрээһиҥҥэ Саха тэлэбиидэнньэтин үлэһиттэрэ кыттыыларын туһунан кэпсэттибит. Дириэктэр санаатын түһүмэхтэргэ арааран билиһиннэрдэххэ маннык.
“Дойдуга көмөлөһөр таһымҥа тиийдибит…”
“Саха” НКИХ устуоруйатыгар аан бастакытын атын эрэгийиэҥҥэ тиийэн, норуоттар икки ардыларынааҕы таһымнаах тэрээһини сырдатыыга дуогабардастыбыт. Бу күннэргэ үлэлиир сыаналаах тиэхиньикэбитин барытын Соҕуруу Сахалинскай куоракка илтибит.
“Азия оҕолоро” оонньуулар ыытыллар сирдэригэр 70-ча үлэһит олунньу саҥатыгар көтүөҕэ. Онно олохтоох “ОТВ” тэлэбиидэнньэни кытта бииргэ үлэлиэхпит. Тэрилтэ салалтата “ОТВ” бэйэтин тиэхиньикэтинэн норуоттар икки ардыларынааҕы таһымнаах оонньуулары сырдаппат буолан, атын хампаанньалартан өйүүрбүтүгэр көрдөспүтэ. Онтон сайаапка киллэрбиттэртэн биһигини талан, бииргэ үлэлээһиҥҥэ дуогабар баттаспыппыт. Онон биһиги ыаллыы уобаласка көмөлөһөр таһымҥа тиийдибит диэн олуһун киэн туттабыт. Дьэ, онон аны билигин бэйэбитин көрдөрөн, уопуттаах дьон быһыытынан ыҥырыыга сылдьан, былдьаһыкка сырыттарбыт ханнык диэн санаалаахпыт.
“Азия оҕолоро” оонньуулары ыытыыга барытыгар үлэлэһэрбит буоллар. Аныгыскы оонньуулар Монголияҕа ыытыллыахтаахтар. Онон Соҕуруу Сахалиҥҥа бэйэбит уһулуччу кыахпытын көрдөрөн, аны Монголияҕа ыҥырылларбыт буоллар диэн баҕа баар.
Тэлэбиидэнньэ — хамаанданан үлэ
Күрэхтэһии олунньу 9 күнүттэн олунньу 17 күнүгэр диэри ыытыллыаҕа.
Хайыһартан саҕалаан хоккей, фигурнай хатааһылааһын, шорттрек, фристайл курдук кыһыҥҥы спорт көрүҥнэрин хампаанньа оператордара, режиссердара, суруналыыстара күн аайы “Матч-ТВ” ханаалга “Спортивнай күннүк (дневник)” таһаарыыга ыытыахтара. Онон улахан үлэ күүтэр. 70-ча киһи диэн иһиттэххэ эрэ элбэх курдук. Тэлэбиидэнньэ — хамаанданан үлэ. Биир суруналыыс дуу, биир оператор дуу соҕотоҕун үлэлээбэт, ол иһин хампаанньа үлэһиттэрэ бөлөхтөрүнэн хайдыһан үлэлиэхтэрэ.
Уопут атастаһан баран
Соҕуруу Сахалин “ОТВ” хампаанньата улахан тэрээһиннэри сырдатар үөрүйэҕэ суох буолан, манна кэлэн уопут атастаспыттара.
“Азия оҕолоро” оонньуулары сырдатар үөрүйэхпитин миэстэтигэр кэлэн көрөн, үөрэтэн баран: “Эһиги хампаанньаҕыт кыаҕа сүрдээх. Бэйэбит олох да кыайыа суох эбиппит. Маннык күүстээх тиэхиньикэ биһиэхэ суох. Онон эһигини эрдэттэн талбыппыт да үчүгэй эбит”, — диэн бэйэлэрэ сырдатартан аккаастаммыттара. Онон биһигини кытта Соҕуруу-Сахалинскай куорат дьаһалтата дуогабардаһан, хампаанньабыт үлэһиттэрэ “Азия оҕолоро” норуоттар икки ардыларынааҕы оонньууну сырдатар буоллулар.
Хампаанньа үлэтэ атахтаммат
Камералар, оператордар, режиссердар бардахтарына, хампаанньа үлэтэ атахтаммат.
Онно биһиги эрдэттэн бэлэмнэппиппит. Дьоммут биир нэдиэлэ устата Соҕуруу Сахалиҥҥа үлэлиир кэмнэригэр биһиги манна сөп түбэһэр гына суоттанан-учуоттанан, олунньутааҕы бырагыраамалары барытын аттаран уонна таҥан былааннаабыппыт. Онон хампаанньа айар үлэтигэр туох да харгыс суох буолуоҕа.
Устуу хартыыналара — 15 дойдуга
Сүрүн сыалбыт-сорукпут – күрэхтэһии хартыыналарын хаачыстыбалаахтык устуу.
Ол эбэтэр хартыыналарбыт спутник нөҥүө Соҕуруу Сахалин куоратын дьаһалтата дуогабардаспыт дойдуларыгар барар. Мин билэрбинэн, 15 дойду биһиги хартыыналарбытын ылаары сакаастаабыт. Ону таһынан, биһиги бэйэбит Сахабыт сиригэр бу оонньууну көрдөрүөхпүт, сырдатыахпыт. Бу улахан ситиһии.
Ыраах айанньыттар тиийэ иликтэр
Соҕуруу Сахалиҥҥа атаарбыт 4 массыынанан айанныыр дьоммут билигин да тиийэ иликтэр. Хабаровскай куораты аастылар3 253 км бары быраабыланы тутуһан, ыксаабакка айанныыллар.
Дуогабар дохуоту аҕалар
Дьон биһигини өйдөөбөт түбэлтэлэрэ баар.
Социальнай ситимнэргэ: “Хампаанньа итиччэ ыраах тиийэн, үбү эрэ ороскуоттуур”, — диэн хомуруйалларын кытта сөспөспөппүн. Оннук буолбатах. Бу күрэхтэһиигэ, төттөрүтүн, биһиги дуогабарга үлэлиир буолан, дохуоттанабыт.
…“Саха” НКИХ устуоруйатыгар тэлэбиидэнньэ туох баар сыаналаах тиэхиньикэтин хомуммутунан, дуогабар быһыытынан атын эрэгийиэҥҥэ тиийэн үлэлиирэ – сонун сүүрээн. Табылыннаҕына, сотору кэминэн аны кыраныысса таһыгар – Монголияҕа тахсыаҕа. Биир дойдулаахтарбытыгар айымньылаах үлэни баҕарабыт!
Елена ПОТОЦКАЯ, «Саха сирэ» хаһыат, edersaas.ru
Хаартыска — “Саха” НКИХ архыыбыттан.