Амма улууһун эдэр силиэдэбэтэлэ Анна Филиппова «Поле чудес» биэриигэ супер-оонньуу кыайылааҕа буолбут диэн батсаапка тарҕаммыта.
Лена Андреева, https://edersaas.ru
Биэриини ааспыт нэдиэлэҕэ устубуттар. Онтулара бүгүн, кулун тутар 3 күнүгэр, 19:50 чаастан саҕаланна. «Бастакы» ханаалга көстөр. Анналыын кэпсэтиини сарсын edersaas.ru сайтка ааҕаарыҥ.
Урут ким кыттыбытай?
Станислав Луковцев
2004 сыллаахха, ыһыах иннинэ соһуччу Станислав Луковцев, Уус-Алдан Бороҕоннооҕу о5о искусствотын оскуолатыгар норуот инструменнарын преподавателэ кыттыбыта. Финалга тиийбитэ. Кини “Эдэр сааска” маннык кэпсээтэ:
— 2003 сыллаахха норуоттар икки ардыларынааҕы куонкурустан кэлэн иһэн «Поле чудес» музейыгар сылдьыбыппыт. Онно «Анкетата толоруҥ, баҕар, Леонид Якубович сөбүлээтэҕинэ ыҥырыа» — диэн буолбута. Мин бэйэм «Авиация уонна космос туһунан коллекциялаахпын, ырыа суруйабын, музыканан дьарыктанабын» — диэн суруйбутум. Онтон оруобуна биир сыл ааспытын кэнниттэн 2004 сыллаахха ыһыах саҕана, мин төрүт да умнан сырыттахпына Москваттан ыҥырыы телеграмма кэлэн соһуппута. Түргэн баҕайытык хомуллан, спонсор булан Москваҕа «Останкино» тиийэн уһуллубутум. Дьиҥинэн, өр баҕайы устар эбиттэр, холобура 3 чаас кэриэтэ уһуллубуппутуттан 45 мүнүүтэлээх буолбута. 5 биэрии кыттыылааҕын 45 киһини мунньан бараннар декларация толотторбуттара. Уйулҕа үөрэхтээхтэр, тэрийээччилэр сүбэ-ама биэрбиттэрэ. Уһуллар күммүтүгэр Якубович бэйэтэ кэлэн кыттыылаахтары кытары кэпсэппитэ. Бастаан киирии долгутуулаах этэ, ол кэнниттэн мин Якубовичка санаппытым рекламаҕа тохтобул диэни. Биир нэдиэлэҕэ биэс передача уһуллубута. Барары-кэлэри улууһум көмөлөспүтэ, Якубовичка убаһа анаабыттара. Онтон учууталлар, оҕолор бэйэлэрин илиилэринэн оҥорбут үлэлэрин бэлэх курдук илдьибитим. Кэлин «Поле чудес» музейыгар турарын көрөн үөрэ санаабыттара…
Сэттэ сыллааҕыта Снежана Чикачева кыайбыта
2010 сыл алтынньытыгар эмиэ Амма кыыһа Снежана Чикачева тиийэн оонньообута. Уонна доҕоттоор, эмиэ кыайбыта! Ол эрэн Якубович супер-оонньуутуттан аккаастаммыта. Снежана «Эдэр сааска» кэпсээтэ:
— 2010 сыллаахха муус устарга Москваҕа ВДНХ-ҕа «Поле чудес» музейыгар сырыттахпытына анкета толорторбуттара. Алтынньы саҥата соһуччу «Вид» телекомпанияттан «эһигини таллыбыт» диэн телеграмма кэлбитэ. Үйэҕэ биирдэ бэриллэр кыаҕы туһаныахха диэн, хомунан айаннаабыппыт. Миигин наһаа сөбүлээбиттэр этэ. Иккистээн эмиэ ыҥырбыттара, үлэбэр тахсыбыт буолан аккаастаммытым. Москватааҕы Постпредство нүөмэрин биэрбитим, кинилэр Саинаны ыыппыттара буолуо. Кыыһым Милена Амма туһунан ырыаны ыллаабыта, Якубович музыкальнай киини бэлэхтээбитэ. Бүгүн эмиэ Амма кыыһа Анна Филиппова баран оонньообутун, кыайбытын телевизорынан көрдүм. Наһаа үөрдүм. Эдьиийэ Диана мин дьүөгэм, Анна барыан иннинэ миэхэ эрийэн сүбэлэппитэрэ. Бэйэҥ бэйэҕинэн буолуохха наада, тупсан көстө сатыыр сыыһа. Холкутук саҥарар, булугас өйдөөх уонна бааттаах буоллаххына кыайыаххын сөп.
Ырыаһыт Саина кыайбыта
Снежана кэнниттэн эмиэ 2010 сыллаахха, ахсынньыга саҥа дьыллааҕы биэриигэ биллэр ырыаһыппыт Саина — Екатерина Саввинова супер-оонньуу кыайыsлааҕа буолбута:
— Москва куоракка олорон ханнык баҕарар артыыс элбэҕи ситиһиэн баҕарар. Барыта билсии, аймахтаһыы — бэйэлэрин эрэ дьоннорун таһаараллар. Күөх экран нөҥүө киһи түргэнник биллэр-көстөр буолар диэммин 1 каналга кыттыахпын олус баҕарар этим. Тоҕо диэтэххэ Болгарияҕа 2005 сыллаахха мин соҕотоҕун бараммын биир улахан бырайыакка кыттыбытым. Ол кэнниттэн миигин Болгария барыта билбитэ. «Поле чудес» программаҕа буор босхо кыттаҕын. Бу 3 передачаҕа кыттаарыбын куруутун репетиция, көстүүм көрдөөһүнэ, режиссер, продюсер тугу эрэ толкуйдууллара — үлэ бөҕөтө. Саха сириттэн сылдьабын диэн эппиэтинэстээхтик сыһыаннаспытым. Тастан көрдөххө чэпчэки курдук, ол эрээри үлэтэ элбэх. Леонид Якубович эфир иннинэ инструкция ыыппыта, хайдах туттарбытын, үөрэрбитин билсиһиннэрбитэ. Мин санаабар фортуна диэн баар быһыылаах, дьиҥинэн кыайар сыал миэхэ суох этэ. Финалга тахсыбыппар “Поле чудес” биэриигэ миэхэ саҕынньах кэтэрдибиттэригэр олус күүскэ үөрбүтүм. Эдэр сааспыттан улахан баҕа санаам этэ. Ол саҕынньахпын үйэтин тухары учууталлаабыт эдьиийбэр бэлэх курдук ыыппытым. Мин толкуйдуурбунан, туох барыта хас биирдии киһиттэн бэйэтиттэн тутулуктаах.
Аан бастакы кыттааччы!
Оттон аан бастакы оонньооччунан сахалартан Семен Дьячковскай буолар. 1996 сыллаахха тиийэн кыттыбыта. Финалга тиийбитэ, кыранан хотторбута.
Лена Андреева, https://edersaas.ru