Сахалар Новгороды фашистартан босхолооһун 75 сылын бэлиэтээтилэр
Новгород куорат фашистартан босхоломмута 75 сыл буолла. Тохсунньу 20 күнүгэр Ил Дархан Айсен Николаев салалталаах Саха сирин бөлөҕө манна туһуламмыт араас тэрээһиннэргэ сырытта. Сахалар байыаннай тиэхиньикэлэри, параады көрдүлэр, «Албан аат үйэлээх уота» мемориалга уонна Новгород куораты босхолооччулар пааматынньыктарыгар сибэкки дьөрбөтүн уурдулар.
Бу тэрээһиннэргэ кыттыах иннинэ, Айсен Николаев Старой Руссаҕа баар Хотугулуу-Илиҥҥи фронт мусуойун көрдө-иһиттэ. Бу мусуойга сэрии кэминээҕи сэдэх экспозициялар көрдөрүүгэ тураллар, саамай сүрүн экспонатынан үс миэтэрэ усталаах ойууламмыт мамонт аһыыта буолар. Манна саха норуотун эпоһа уонна Ильмень күөлгэ буолбут кыргыһыы ойууланар. Бу Аким Бурцев диэн саха биллиилээх маастарын оҥоһугун 1970 сыллаахха Старорусскай оройуоҥҥа бэлэх быһыытынан биэрбиттэрэ.
Ону тэҥэ, Саха сирин бөлөҕө Буреги уонна Ильмень күөл кытылыгар турар Устреке диэн дэриэбинэлэргэ баар саха буойуттарыгар аналлаах пааматынньыктарга сибэкки дьөрбөтүн уурдулар.
edersaas.ru