Сүрүн Уопсастыба

Саха сирэ кэпэрээссийэҕэ Уһук Илиҥҥэ бастыҥ

Москваҕа бүгүн, сэтинньи 16 күнүгэр, Бүтүн Россиятааҕы кэпэрээссийэ сийиэһэ саҕаланар. Онно биһиги өрөспүүбүлүкэбититтэн дэлэгээттэрдиин, ыҥырыылаахтардыын 20-чэ киһи кытта барда. Кинилэр ортолоругар бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев, астыыр-таҥастыыр салаа департаменын салайааччыта Василий Афанасьев уонна өрөспүүбүлүкэ, улуус таһымнаах тыа хаһаайыстыбатын потребительскай, производственнай, кирэдьииттиир кэпэрэтииптэрин салайааччылара бааллар.

edersaas.ru


Сийиэс дэлэгээттэрэ – «СахаАгроПродукт» ӨТХПХБК бырабылыанньатын бэрэссэдээтэлэ Константин Тимофеев, Саха сирин хортуоппуй уонна оҕуруот аһын үүннэрээччилэрин сойууһун бэрэссэдээтэлэ Валерий Фомин аҕыйах хонуктааҕыта Хабаровскай куоракка кэпэрээссийэҕэ уонна дьоҕус урбааҥҥа анаммыт Бүтүн Россиятааҕы конференцияҕа кыттан кэлбиттэрэ. Валерий Матвеевич «Уһук илиҥҥи гектары» баһылааһын кэмигэр батарыыны өйөөһүн механизмнара» секцияҕа Саха Өрөспүүбүлүкэтин кэпэрээссийэҕэ уопутун, «Уһук илиҥҥи гектар» бырагырааманан сир ылбыт дьону үлэлии турар кэпэрэтииптэргэ тардыы тустарынан кэпсээбит.

К.Е.Тимофеев быыстапка кэмигэр

 

Оттон Константин Егорович «Олохтоох бородууксуйа — «уһук илиҥҥи гектарга» кэпэрээссийэни сайыннарыы төрдүн быһыытынан» секцияҕа кыттан, «СахаАгроПродукт» ӨТХПХБК холобуругар таһымнаах кэпэрээссийэ уопутун билиһиннэрбит. Кини бэлиэтииринэн, Уһук илиҥҥи федеральнай уокурук үрдүнэн кэпэрээссийэ тиһигэ Саха сиригэр эрэ үлэлиир. Саната таарыйа эттэххэ, быйыл күһүн биир улахан форумҥа дойдубут баһылыга Владимир Путин Россияҕа кэпэрээссийэ сайдыбыт, тэнийбит үс бастыҥ регионын  иһигэр Саха Өрөспүүбүлүкэтин мээнэҕэ ааттаабатаҕа чахчы.

Хабаровскай, Приморскай кыраайдар, Амур уобалаһа кэлиҥҥи сылларга сүөһүлэрин ахсаанын лаппа сарбыйбыттар. Онуоха ынах сүөһүгэ хаан ыарыыта турбута, халаан содула сылтах буолбуттар. Холобур, Хабаровскай бэйэтин нэһилиэнньэтин үүккэ 12, эккэ 15 эрэ бырыһыанын хааччыйан олорор. Ити эҥээргэ, Амуру киллэрэн туран, сэбиэскэй саҕаттан сүөһү аһылыгын оҥорон таһаарыыга күүскэ үлэлээбиттэрин билэбит. Ол бааһыналар баһыйар аҥаардара быраҕыллан, оһорбо сиргэ кубулуйан эрэллэр. “Уһук илиҥҥи гектар” боппуруоһа көтөҕүллүбүт төрдө-төрүөтэ итиннэ сытар. Бэйэбит дьоммут үлэлиэхтэрин баҕарбат буоллахтарына, атын сиртэн кэлэн үлэлээтиннэр диэн тэрийдэхтэрэ”, — диир Константин Егорович.

Хаҥастан уҥа: В.М.Фомин, К.Е.Тимофеев — Хабаровскай кыраай «Краснореченскай» кэпэрэтиибигэр

“Саҕалааччы фермери өйөөһүн”, “Дьиэ кэргэн сүөһү иитэр фермаларын сайыннарыы” курдук федеральнай бырагыраамаларга букатын кыттыбаттарын суота эбит. Грант ылан үлэлии сылдьар уонча эрэ фермердээхтэр. Ити эрээри, “уһук илиҥҥи гектар” түҥэтиллиэҕиттэн мүөккэ, оҕуруот аһыгар, сир аһыгар кыралаан ылсан эрэллэр. Сояҕа, оҕуруот аһыгар кытайдар кытта киирбиттэр.

“Биһиги бу бэлиитикэни бэйэбит туһабытыгар эргитэ тутан, улуустарга, нэһилиэктэргэ туһаныллыбакка сытар сирдэрбитин ылан, сүөһүнү-сылгыны иитиигэ харса суох үлэлиэхтээхпит,  — диир Константин Тимофеев. – Ыаллыы сытар регионнарбыт ырыынактарыгар сүөһү-сылгы этин, ынах арыытын, балыгы, сир аһын хайа баҕарар  батарар кыах баар. Оттон уотурбаны, бурдук сиэмэтин кинилэртэн ылыахпыт. Быһата, табаарбытын атастаһыахтаахпыт. Ол иһин, биһиги регионнар икки ардыларыгар кэпэрээссийэлэһэн үлэлээһини тэрийэргэ этии киллэрдибит”.

Олохтоох бородууксуйаны оҥорон таһаарааччылар национальнай ассоциацияларын бэрэсидьиэнэ, ресторатордар уонна отельердар федерацияларын вице-бэрэсидьиэнэ Иван Меркулов Саха сирин кэпэрээтэрдэрин этиилэрин өйөөбүт уонна: “Эһиги олус улахан кээмэйгэ ылсыбакка, хаачыстыбаҕа үлэлээн, үрдүк сыанаҕа батарарга суоттаныҥ”, — диэн алҕаабыт.

Василий НИКИФОРОВ, «Саха сирэ» хаһыат, edersaas.ru

 

 

1
0

Добавить комментарий