Омук киһитэ саха дьахтарын күүһүлээбититтэн сылтаан, улахан айдаан таҕыста. Ол өрөспүүбүлүкэҕэ эрэ буолбакка, дойдуга тиийэ билиннэ. Бу ыар буруйу оҥорууга уорбаланааччылар тутуллубуттарын, биирдэрэ хаайыллыбытын үрдүнэн, сорох сорохтор уоскуйа иликтэр.
Уохтара-кылыннара уҕарыйа илик, сөбүн-сөтөгөйүн араарбат буолбут бэйэбит уолаттарбыт омуктар атыылыыр ларектарыгар тиийэн, ыспыт-тохпут, күлүгээннээбит чахчылара бэлиэтэннилэр. Ол уолаттар тутуллубуттар.
Кулун тутар 19 күнүгэр кэлии омук киһитин бэстилиэтинэн тирээн туран, суол устун ханна эрэ илдьэн испит киһини (видеота тарҕаммыта) полицейскайдар туппуттар.
Ити бөрүкүтэ суох чахчыларынан сибээстээн, Дьокуускай куорат полициятын начаалынньыга, полиция полковнига Николай Кульбертинов видеонан санаатын тиэртэ.
«Бэйэ-бэйэни харыстаһыаҕыҥ, тулуурдаах буолуоҕуҥ! Омугумсуйууну күөртүүр провокацияларга киирэн биэримэҥ! » диэн ыҥырда.
Ханнык баҕарар бэрээдэги кэһии, буруйу оҥоруу иһин омугуттан тутулуга суох административнай да, холуобунай да эппиэтинэс көрүллэрин умнумаҥ!
Вера Макарова, «Саха сирэ» хаһыат, edersaas.ru
Хаартыска уонна видео: СӨ ИДьМ-тын пресс-сулууспата.