Московскай уобалас Вороновскай бөһүөлэгэр спортивнай хаамыыга Арассыыйа чөмпүйэнээтэ түмүктэннэ. Манна М.К. Аммосов аатынан Хотугулуу-Илиҥҥи федеральнай университет физическэй култуураҕа уонна успуорка институтун иккис кууруһун устудьуона Пелагея Григорьева ситиһиилээхтик кытынна.
Пелагея ыччаттар ортолоругар 20 км уһуҥҥа хааман, төрдүс миэстэ буолла уонна чэпчэки атлетикаҕа Арассыыйа успуордун маастарын нуорматын толордо. Бу маннык уһуҥҥа кини иккис күрэхтэһиитэ буолар.
«Пелагея спортивнай хаамыы сиэксийэтигэр сылтан итэҕэс сырытта. Бу иннинэ 400 миэтэрэҕэ сүүрэрэ, хотугу многоборьенан дьарыктанара. Хаамыыга бастаан кыһын Сочига ыытыллыбыт дойду чөмпүйэнээтигэр 1 чаас 46 мүнүүтэ көрдөрүүлээх кыттыбыта. Оттон билигин бу бириэмэтин куоһаран, 1 чаас 38 мүнүүтэ 51 сөкүүндэ оҥордо. Бу көрдөрүү Арассыыйа успуордун маастарын нуорматын икки мүнүүтэ курдугунан аһарар», — диэн институт старшай преподавателэ Алексей Барцайкин иһитиннэрэр.
Оттон Пелагея маннык кэпсиир: «Мин маннык көрдөрүүнү аҕалбыппыттан астынным. Хааччахтааһынынан бэлэмнэнэрбэр олус кылгас кэм баара, бэс ыйыттан саҕалаабытым. Мин успуорт маастарын нуорматын толорбуппунааҕар, 1 чаас 39 мүнүүтэни аһардыбыппыттан быдан үөрдүм. Бу салгыы сайдарбар олус суолталаах. Тириэньэрдэрбэр уонна институппар махтанабын».
ХИФУ пресс-сулууспата.