Култуура Маны аах

«Сахафильм» режиссердара Приморскай кыраайга Саха киинэтин киэһэтин ыыттылар

Атырдьах ыйын 31 күнүгэр Максим Горькай аатынан Приморскай кыраай публичнай бибилэтиэкэтигэр Саха киинэтин киэһэтэ буолан ааста. Көрсүһүүгэ ускуустуба уонна киинэ эйгэтин үлэһиттэрэ, устудьуоннар, биир дойдулаахтарбыт, уопсастыбаннас уонна СМИ бэрэстэбиитэллэрэ кэлбиттэр.

Киэһэ бочуоттаах ыалдьыттарынан «Сахафильм» киинэ хампаанньа художественнай салайааччыта Алексей Романов уонна «Сахафильм» режиссера Никита Аржаков буоллулар.

Мустубут дьоҥҥо эҕэрдэ тылын СӨ бырабыыталыстыбатын бэрэссэдээтэлин солбуйааччы, Уһук Илиннээҕи Федеральнай уокурукка Саха сирин бастайааннай бэрэстэбиитэлэ Ким Борисов эттэ. Кини сахалыы киинэни аан дойду үрдүнэн уонунан мөлүйүөн көрөөччүнү сэргии көрөрүн уонна «Саха киинэтэ» диэн ураты бренд баар буолбутун бэлиэтээн эттэ.

Көрсүһүүнү бибилэтиэкэ дириэктэрэ Александр Брюханов салайан ыытта. Мустубут дьон киинэ Саха сиригэр хайдах быһыылаахтык усталларын, артыыстары таҥыы, үбүлээһин, быракаат ымпыктарын-чымпыктарын туһунан бэрт элбэх ыйытыылары биэрдилэр. Аатырбыт режиссердар бары ыйытыыыларга ирэ-хоро хоруйдаатылар, тус бэйэлэрин уопуттарынан үллэһиннилэр.

Билигин Саха сиригэр сыллата 8-10 киинэ тахсар, кэнники 10 сылга 95  уус- уран киинэ таҕыста.

Кэлиҥҥи сылларга Саха кинематографистарын киинэлэрэ Арассыыйа уонна аан дойду таһымыгар улахан наҕараадалары ылаллар. «Сахафильм» киинэ хампаанньа киинэлэрэ 50-тан тахса үрдүк таһымнаах киинэ бэстибээллэрин наҕараадаларын хомуйан кэлбиттэрэ.

«Саха сирэ» хаһыат, edersaas.ru

Хаартыска sakha.gov.ru

0
0