Маны аах Уопсастыба

«Сахаэнерго» өрөмүөн үлэтин былаан быһыытынан кээрэтэр

«Сахаэнерго» чуолаан хотугу улуустары итиинэн уонна уотунан хааччыйар. Ол быһыытынан  сайыҥҥыттан дизельнэй ыстаансыйалары, хочуолунайдары, турбиннай оборудованиелары, уот, инженернэй ситимнэри өрөмүөннүүр, уот лииньийэтин бырасыакаларын кэҥэтэр. Хампаанньа 23 улууһу уотунан, итиинэн хааччыйар, билигин ити улуустарга барыларыгар өрөмүөн үлэтэ  ыытылла турар.

Билиҥҥи туругунан,  59 дизельнэй ыстаансыйа мотуордарын (15,8 МВт кыамталаах), 27 генараторы, 17 трансформаторнай подстанцияны уонна 5 трансформаторы өрөмүөннээн бүтэрбиттэр. «Сахаэнерго” исписэлиистэрэ бу  күннэргэ 57,8 км уһуннаах уот ситимигэр өрөмүөнү оҥорон түмүктээтилэр. Итинтэн улахан кээмэйэ Аллараа Халымаҕа ыытылынна. Итини тэҥэ, 1,5 км уһуннаах инженернэй ситими тартылар, сыллааҕы былаантан 34 %-нын толорбуттар.  Уот лииньийэтэ ааһар бырасыакаларыгар мас үүммүтүн ыраастааһын 85 % ситиһиллибит. Усуйаана улууһун Депутатскай бөһүөлэгэр  ТЭЦ-кэ ууну сылытар икки хочуолу кыраапык былааныттан эрдэ өрөмүөннээн бүтэрдилэр.

«Өрөмүөн бырагырааматын былаана хайаан да туолуохтаах. Оччоҕуна эрэ  күһүн, кыһын уонна саас хотугу уонна Арктика улуустарыгар  уотунан, итиинэн хааччыйыы тохтоло уонна ноҕорууската суох бэриллэр кыахтаах»,  — диэн «Сахаэнерго»  генеральнай дириэктэрин 1-кы солбуйааччы, кылаабынай инженер Петр Кондратьев этэр.

Кылгас ыспыраапка

«Сахаэнерго» АУо 23 улууһу электроэниэргийэнэн уонна итиинэн хааччыйар, ити улуустарга 105 тыһыынча киһи олорор. Хампаанньа ити улуустарга барыта 145 электроыстаансыйаны  (216, 7 МВт кыамталаах) үлэлэтэр уонна 2058 км уһуннаах уот лииньийэтин көрөр-истэр.

0
0
Telegram @edersaas20