Экэниэмикэ

«Сахаэнерго» оттугу тиэйии былаанын толордо

«Сахаэнерго» АУо быйылгы сылга оттугу тиэйии былаанын  барытын толордо.

Ол курдук, Өлүөнэ, Алдан,  Дьааҥы, Индигиир, Халыма  уонна хотугу муора суолунан  100938 туонна  оттугу, ол эбэтэр, 81808 туонна сэлээркэни, 300 туонна ньиэби уонна 18756 туонна таас чоҕу  тустаах аадырыстарга тиэртэ.   Оттугу  тиэрдии «Сахаэнерго»  хас биирдии филиалларыгар  туспа эппиэтинэһи эрэйэр,  ол курдук, хас биирдии улуус суола-ииһэ ураты уонна бэйэ-бэйэлэриттэн ыраах сыталлар.

«Сахаэнерго» АУо генеральнай дириэктэрэ  Гаврил Алексеев   оттугу тиэрдии этэҥҥэ түмүктэммитинэн онно кыттыбыт тэрилтэлэр исписэлиистэригэр, салайааччыларыгар махталын тиэрдэр.  «Быйылгы навигация уустук кэмҥэ буолан ааста. Ол эрээри, таһаҕаһы тиэйээччилэр уопуттаах буолан, туруоруммут былааммытын  барытын үмүрүттүлэр», — диэн Гаврил Николаевич  санаатын үллэһиннэ.

Санатар буоллахха, «Сахаэнерго” АУо  ордук хоту улуустарга оттугу тиэрдиигэ «Энерготранснаб» АУо, «Өлүөнэтээҕи холбоһуктаах пароходство” АУо, Дьааҥытааҕы өрүс пароходствотын, Хатаҥнааҕы муора пуордун, Халыматааҕы суудуналар хампаанньаларын кытта өрүү бииргэ үлэлиир.

 

0
0