VII Илиҥҥи экэнэмиичэскэй пуорум кэмигэр Арассыыйатааҕы «Экспортер года» бириэмийэ кыайыылаахтарын наҕараадалаатылар. «Сахачай» хампаанньа «Экспортер года в сфере готовой продукции АПК» номинацияҕа иккис миэстэни, оттон хампаанньа салайааччыта Нюргуяна Заморщикова «Лучшая женщина-экспортер» номинацияҕа үһүс миэстэни ылла. Кыайыылаахтары Ил Дархан Айсен Николаев эҕэрдэлээтэ.
«Саха сирэ сиртэн хостонор туһалаах баайы-дуолу туһаҕа таһаарар эрэгийиэн быһыытынан биллэр. Кэлиҥҥи сылларга биһиги улахан болҕомтобутун атын салаалары сайыннарыыга, экспорка таһаарыыга уурабыт. Холобур, айти-өҥөлөрү экспорка таһаарыы кээмэйэ улаатта. Билигин продовольственнай табаары таска таһаарыы саҕаланан эрэриттэн үөрэбин. Уһук Илиҥҥи предприятиелар табаардара аан дойду ырыынагар элбииллэригэр баҕарыам этэ», — диэн Айсен Николаев бэлиэтээн эттэ.
«Экспортер года» бириэмийэни РФ Бырабыыталыстыбата олохтообута. Куонкурус «Международная кооперация и экспорт» национальнай бырайыак иитинэн ыытыллар.
Ньургуйаана Заморщикова: «Ылсыбыккытын адьас ыһыктымаҥ» (ВИДЕО)
edersaas.ru