Сахабыт сирин хорҕолдьунун туһаҕа таһаарыыны кытайдар интэриэһиргээтилэр
Владивосток куоракка балаҕан ыйын 11-13 күннэригэр төрдүс Илиҥҥи экономическэй форум буолуоҕа. 50 дьыалабыай тэрээһин чэрчитинэн панельнай сессиялар, бизнес-кэпсэтиилэр, төгүрүк остуоллар ыытыллыахтара. Быйылгы форум «Уһук Илин ис кыаҕын арыйыы» диэн ааттанна.
edersaas.ru
Бу улахан тэрээһиҥҥэ өрөспүүбүлүкэ сиртэн хостонор баайын туһаҕа таһаарыы боппуруостарын дьүүллэһиэхтэрэ. Кытай инвестордара Уһук хоту Тирэхтээххэ хорҕолдьуну хостооһуну интэриэһиргээтилэр. Бырабыыталыстыба бэрэссэдээтэлэ Владимир Солодов этэринэн, «РИК» иһинэн тэриллибит «Янолово» тэрилтэ бырайыагын кытай хампаанньаларын кытта дьүүллэһиэхтэрэ.
Саха сирин хорҕолдьунун туһаҕа таһаарар бырайыакка үп-харчы угуу кээмэйэ ортотунан 4 млрд солк. сыаналанар. Өрөспүүбүлүкэ хотугулуу-илиҥҥи өттүгэр айылҕа баайын хостуур урутаан сайдар сир аһылыннаҕына, якорнай резидент быһыытынан хорҕолдьун бырайыага буолуон сөптөөҕө ыйыллар.
Ону таһынан, хотугулуу-илиҥҥи сэдэх таастардаах Томтор сирин сайыннарыы, Элгэҕэ таас чоҕу хостуурга үбү-харчыны угуу туһунан кэпсэтиэхтэрэ.
Марианна Тыртыкова, «Саха сирэ», edersaas.ru