Уһун, тымныы кыһыннаах Саха сирин биир сүрүн брендинэн күндү түүлээх, оттон «Сахабулт» ААУо өрөспүүбүлүкэ аграрнай бырамыысыланнаһын стратегическай суолталаах тэрилтэтэ буолар.
Түүлээх соҕотуопкатын уонна таҥастааһынын, батарыытын иилээн-саҕалаан тэрийэр тэрилтэ өрөспүүбүлүкэтээҕи, Бүтүн Арассыыйатааҕы итиэннэ аан дойдутааҕы быыстапка-дьаарбаҥкаларга көхтөөхтүк кыттар, улахан сэҥээриини ылар. Көрдөрүүлэрин сыллата тупсарар. Ол курдук, 2013 сыллаахха 117 мөл. солк. суумалаах норуот туттар табаарын (этэрбэһи, бэргэһэни, саҕынньаҕы, сувениры) уонна күндү түүлээҕи батарбыт буоллаҕына, 2017 сыл түмүгүнэн бу көрдөрүү 185 мөл. солк. тэҥнэстэ. Тириини таҥастыыр хайысханы саҥардан, аны тирии таҥаһынан дойду ырыынагар тахсарга былаанныыр. Сомоҕолоһуу күнүнэн «Сахабулт» эргиэн-быыстапка киинин иккис уочаратын арыйда
Михаил Павлов, «Сахабулт» ААУо генеральнай дириэктэрэ:
— Кэнники икки сылга биһиги бу киини тэрийиигэ күүскэ үлэлээтибит. Манна «Сахабулт» күндү түүлээхтэн, тирииттэн бородууксуйаларын сэргэ олохтоох маастардар, уран тарбахтаах уустар, иистэнньэҥнэр итиэннэ Дьокуускайдааҕы технология уонна дизайн кэллиэһин устудьуоннарын оҥоһуктара атыыга таһаарыллыаҕа. Кэлэр өттүгэр «биир түннүгү» арыйан, нэһилиэнньэ күндү түүлээҕи уонна тириини табаарга мэнэйдэһэр өҥөтүн тэрийиэхпит, аукционнары ыытар буолуохпут.
Раиса Сибирякова, «Саха сирэ» хаһыат, edersaas.ru