Саха сирин Ил Дархана Айсен Николаев сорудаҕынан, өрөспүүбүлүкэ былаастара убаҕас мэдиссиинискэй кислороду Дьокуускайга оҥорууну хааччыйыынан дьарыктаналлар. 2021 сыл атырдьах ыйыгар Нерюнгри оройуонугар «Саха сирин кислорода» тэрилтэ үлэтин саҕалаабыта, онон мэдиссиинискэй тэрилтэлэр наадыйыылара аан бастаан толуйуллубута.
Онуоха эрэгийиэн былаастара көҥүлү биэрэргэ, федеральнай уорганнартан тустаах көҥүллэри ыларга, балыыһалары кытары дуогабар түһэрсэргэ улахан көмөнү оҥорбуттара. Ону таһынан киин куоракка «Сахаагроплем» тэрилтэ базатыгар убаҕас мэдиссиинискэй тэрили оҥорорго бэлэмнэнии үлэтэ саҕаламмыта Исписэлиистэр хайыы үйэ тустаах үөрэҕи баһылаабыттара. “Сотору убаҕас мэдиссиинискэй кислороду оҥорорго быраабы ылар процедуралар бүттүлэр эрэ, «Сахаагроплем» убаҕас кислороду наадыйааччыларга тириэрдэн барыаҕа”, —диэн кулун тутарга суруйбуппут.
Онтон билигин Саха сиригэр убаҕас мэдиссиинискэй кислороду оҥорор иккис тэрилтэ – “Сахаагроплем” ковид-19 ыарыһахтарга бастакы 8 туонна кислороду тириэрдэр буолла.
“Сахаагроплем” хампаанньа сөбүлэһии процедуратын барытын ааста, РФ Бырамыысыланнас, эргиэн министиэристибэтин көҥүлүн уонна Арассыыйа Доруобуйа харыстабылын регистрациялыыр дастабырыанньатын ылла.
Саха сиринээҕи бырамыысыланнас уонна геология министиэристибэтин пресс-сулууспата иһитиннэрбитинэн, бүгүн Өрөспүүбүлүкэтээҕи 2 №-дээх балыыһаҕа бастакы кислородтары тириэрдии саҕаланна.
“Биһиги министиэристибэбит оҥорон таһаарааччылары кытары Саха сиригэр доруобуйа харыстабылын секторын өйүүргэ туох кыалларын барытын оҥорор. СӨ Тыатын хаһаайыстыбатын министиэристибэтин исписэлиистэрин кытары мэдиссиинискэй кислороду оҥорор сорукка суһаллык ылыстылар. “Сахаагроплем” бородууксуйатын эмтээх сириэстибэ быһыытынан көҥүлү биэрэри уонна регистрация хаамыытын түргэтэппиппит. Ол түмүгэр киин куораппытыгар саҥа оҥорон таһаарааччы баар буолбута. Пандемия өссө да букатыннаахтык чугуйа илик, онон биһиги ханнык баҕарар балаһыанньаҕа бэлэм буолуохтаахпыт. Олохтоох оҥорон таһаарааччылар биһиги балыыһаларбытын салҕыы өйүүргэ бэлэмнэр”, — диэн СӨ быраамысыланнаһын уонна геологиятын миниистирэ Максим Терещенко иһитиннэрдэ.
Надежда ЕГОРОВА, «Саха сирэ», edersaas.ru