Сүүрбэһис үбүлүөйдээх Манчаары Оонньууларын чэрчитинэн, от ыйын 8 күнүгэр Үөһээ Бүлүүгэ спорт национальнай көрүҥнэригэр “Сахаада-спорт” ассоциация 25 сылыгар анаммыт уопсастыбаннас үөрүүлээх мунньаҕа буолла. Тэрээһиҥҥэ Манчаары Оонньууларын бастакы тэрийээччилэрэ, чөмпүйүөннэрэ, эмиэ ити күннэргэ ыытыллыбыт Бүттүүн Арассыыйатааҕы научнай кэмпириэнсийэ кыттыылаахтара, спорт бэтэрээннэрэ ыҥырыллан сырыттылар.
Мунньаҕы аһарыгар СӨ Конституционнай Суутун бэрэссэдээтэлэ, РФ үтүөлээх юриһа, “Сахаада-спорт” ассоциация салайааччыта Александр Ким-Кимэн үбүлүөйдээх Манчаары Оонньуулара үрдүк тэрээһиннээхтик ыытыллалларыгар Ил Дархан, бырабыыталыстыба бэрэссэдээтэлин солбуйааччы, Оонньуулары тэрийэр кэмитиэт салайааччыта Михаил Гуляев, Спорт министиэристибэтэ (миниистир Георгий Балакшин), “Үөһээ Бүлүү улууһа” муниципальнай тэриллии дьаһалтата (баһылык Владимир Поскачин), Манчаары Баһылай аатынан спорт национальнай көрүҥнэрин сайыннарыыга киин (дириэктэр Иннокентий Григорьев) көмөлөрө, оруоллара улаханын бэлиэтээтэ.
Александр Николаевич 1992 сыллаахха, Чурапчыга, Саха сирин норуоттарын Спортивнай оонньууларын кэмигэр, спорт национальнай көрүҥнэрин сайыннарар тускуллаах “Сахаада-спорт” ассоциация тэриллибитин уонна күн бүгүҥҥэ диэри спорт национальнай көрүҥнэригэр федерация үлэтин-хамнаһын чиэстээхтик салҕаан кэлбитин, ассоциация Тустуу аан дойдутааҕы федерациятын кытта 2010 сыллаахха түһэрсибит сөбүлэһиитигэр олоҕуран хапсаҕайбыт, мас тардыһыыбыт аан дойду таһымыгар тахсыбыттарын, сир-сир аайы киэҥ сэҥээриини ылбыттарын эттэ.
Дойду бэрэсидьиэнэ Владимир Путин Арассыыйа норуоттарын национальнай көрүҥнэрин олимпийскай дьиссипилиинэлэргэ киллэртэрэргэ кыһаллыахха диэн эппитин санатан туран, Александр Николаевич кэнэҕэһин саха национальнай көрүҥнэриттэн биирдэрэ эмит олимпийскай көрүҥүнэн буоларыгар эрэллээҕин, онуоха “Сахаада-спорт” бу үйэ чиэппэрин устата онно туһуламмыт үлэни ыытан, иилээн-саҕалаан кэлбитин ыйда.
“Сахаада-спорт” ассоциация салайааччыта Ил Түмэн дьокутааттарын, Юрий Баишев салайааччылаах сис кэмитиэт өйөөһүннэринэн “Спорт национальнай көрүҥнэрин туһунан” СӨ сокуона ылыныллыбытын, ону ааһан Михаил Гуляев көмөтүнэн биһиги туруорсуубут болҕомтоҕо ылыллан, “Спорт уонна физическэй култуура туһунан» РФ сокуонугар спорт национальнай көрүҥнэрэ, хантан силистээхтэриттэн-мутуктаахтарыттан тутулуга суох, дойду бары субъектарыгар сайыннарыллыахтаахтар диэн уларытыылар, чопчулааһыннар киллэриллибиттэрин кэпсээтэ, итиэннэ бу дьоһун ситиһии буолар диэн тоһоҕолоон бэлиэтээтэ.
СӨ бырабыыталыстыбатын бэрэссэдээтэлин солбуйааччы Михаил Гуляев спорт национальнай көрүҥнэригэр Саха сиригэр курдук, дьоһун болҕомто дойду биир да регионугар ууруллубат диэн туран, өбүгэлэрбит айылҕа тыйыс усулуобуйаларын тулуйарга эттэрин-хааннарын эрчийбит спорт көрүҥнэрэ XXI үйэҕэ салгыы сайыннарыллалларын, ол биир туоһутунан балтараа тыһыынча кэриҥэ кыттааччылаах сүүрбэһис Манчаары Оонньуулара үрдүк тэрээһиннээхтик ыытылла тураллара буоларын эттэ.
Үөрүүлээх мунньахха Ил Түмэн бэрэссэдээтэлин солбуйааччы Анатолий Добрянцев, спорт миниистирэ Георгий Балакшин, Үөһээ Бүлүү улууһун баһылыга Владимир Поскачин, Ил Түмэн дьокутаата Елена Голомарева, Ил Түмэн дьокутаата, олимпийскай чөмпүйүөн Павел Пинигин, Манчаары Баһылай аатынан спорт национальнай көрүҥнэригэр киин дириэктэрэ Иннокентий Григорьев, Мэҥэ Хаҥалас улууһун баһылыга Николай Старостин, Чурапчы улууһун баһылыга Андрей Ноговицын, спорт бэтэрээннэрэ уо. д. а. тыл эттилэр, спорт национальнай көрүҥнэрин, оонньууларын салгыы саҥа таһымҥа таһааран сайыннарыаҕыҥ диэтилэр.
Тэрээһин түмүктэниитигэр сахалыы оонньуулары сайыннарыыга өҥөлөөх дьоҥҥо, спорт бэтэрээннэригэр “Сахаада-спорт” ассоциация 25 сылыгар анаммыт кинигэлэр, өйдөбүнньүк мэтээллэр туттарылыннылар.
Роман Попов, «Саха сирэ» хаһыат, edersaas.ru
Ааптар хаартыскаҕа түһэриилэрэ.