Олунньу 16-17 күннэригэр Р.М. Дмитриев аатынан Олимпийскай эрэл училищетын саалатыгар 1998-2000 сыллаах төрүөх уолаттар ортолоругар көҥүл тустууга өрөспүүбүлүкэҕэ бастыыр иһин күрэхтэһии буолар.
edersaas.ru
Бу Саха сирин тустууктарыгар киэҥ аартыгы тэлбит, тустууга саха омук кыаҕын арыйбыт ааттаах бөҕөспүт Николай Захаров-Сахаачча кэриэһигэр үһүс сылын ыытыллар күрэс түмүгүнэн Уһук Илиҥҥи уокурук чөмпүйэнээтигэр (Хабаровскай) уонна олимпийскай чөмпүйүөн Роман Дмитриев кэриэһигэр норуоттар икки ардыларынааҕы турнирга (Дьокуускай) кыттар Саха сирин хамаандата сүүмэрдэниэҕэ.
Турнирга Арассыыйаҕа бастыыр иһин күрэхтэһии боруонса призера Айсен Потапов, аан дойдутааҕы түһүлгэлэр кыайыылаахтара Алексей, Петр Копыловтар, аан дойдутааҕы күрэс призера Петр Константинов, “Роман Дмитриев” турнир чөмпүйүөннэрэ Быйаман Яковлев, Георгий Кычкин, норуоттар икки ардыларынааҕы күрэхтэһии призера Максим Толмачев , уо.д.а. тустуохтара.
Күрэс UWW саҥа быраабылатынан 54, 57, 61, 65, 70, 74, 79, 86, 92, 97 уонна 125 кг ыйааһыннарга ыытыллыаҕа. Турнир кыттыылаахтарын сэрэбиэйдэһиилэрэ олунньу 16 күнүгэр буолуоҕа.
Олунньу 17 күнүгэр
8-00 ч. — ыйааһыннаныы
10-00—14-00 ч. – барыллаан хапсыһыылар
15-00 – күрэхтэһиини үөрүүлээхтик арыйыы
16-00 – 18-00 – түмүк хапсыһыылар, кыайыылаахтары наҕараадалааһын.
Ыспыраапка
Эдэр сааһыгар олохтон туораабыт Николай Захаров-Сахаачча (20.12.1948—1969) улуу тириэньэр Дмитрий Коркин биир талааннаах, чаҕылхай иитиллээччитэ этэ. Кини 1967 сыллаахха Саха сирин, Сибиир уонна Уһук Илин, ыччаттарга ССРС чөмпүйүөннэринэн, “Олимпийскай эрэллэр” норуоттар икки ардыларынааҕы турнир (Кошалине, Польша) кыайыылааҕынан буолбута.
Роман Попов, “Саха сирэ” хаһыат, edersaas.ru