Спортиҥҥа 54-с Европа күрэхтэһиитигэр Саха сирин ытааччылара Айаал Макаров, Николай Кобяков уонна Рамил Николаев бастыҥ көрдөрүүнү олохтоотулар. Кинилэр бүгүн сарсыарда 11:00 чааска Дьокуускайга көтөн кэллилэр.
Европа күрэхтэһиитэ бэс ыйын 3-6 күннэригэр Москва таһыгар «Лисья нора» ытыы комплексыгар ыытылынна.
Уопсайа 240 ытааччы Европа 10 дойдутуттан кыттынна: Германия, Франция, Англия, Венгрия, Латвия, Литва, Беларусь, Казахстан, Азербайджан уонна Россия.
Саха ытааччыта, Кэбээйи улууһуттан төрүттээх, Арассыыйа спордун маастара, дойду хас да төгүллээх чемпиона Николай Кобяков спортинг күрэхтэһиитигэр кыттан, кыраҕы харахтааҕын, сатабыллааҕын итэҕэтэн кыайыыны ситистэ. Арассыыйа чөмпүйүөнэ буолла. Саха киһитэ 200 сыалтан 182-ни ытан, абсолютнай күрэхтэһиигэ кыһыл көмүс мэтээли ылла.
«Европа күрэхтэһиитэ «Лисья нора» ытыы комплексыгар үрдүк таһымнаахтык ааста. Европаттан 20-чэ спортмен кэлэн кытынна. Андрес Черданели, Томас Джери, курдук ааттаах ытааччылар кэлэн күрэхтэстилэр. Ону тыҥааһыннаах күрэхтэһии түмүгүнэн биһиги бастаатыбыт. Мин спортинынан дьарыктаммытым быйыл 11 сыл буолла», — диэн Николай Кобяков кэпсээтэ.
Аан дойду уонна Европа чемпиона Айаал Макаров 180 тэриэлкэни табан, бочуоттаах үһүс миэстэ буолла. Үрүҥ көмүс мэтээли Венгрияттан сылдьар Андрес Черданели ситистэ. Ону таһынан Саха сириттэн Игорь Егоров Европа уон күүстээх ытааччыларын ахсааныгар киирдэ.
Юниордар бөлөхтөрүгэр 15 саастаах Саха спортсмена Рамир Николаев бастаата. Кини 164 сыалы тапта. Манна эбэн эттэххэ, Рамир спортиҥҥа Азия чемпиона буолар.
«Күрэхтэһиигэ миигиттэн улахаттар уонна уопуттаах спортсменнар кыттыбыттара. Миигин аҕам дьарыктыыр, сүбэлиир-амалыыр, уопутун үллэстэр. Күрэхтэһии 4 күнэ олус ыараханнык ааста. Онно барытыгар аҕам көмөлөһөн, кыайыыны ситистим», — диир Рамир Николаев.
Сахалар бэтэрээннэр бөлөхтөрүгэр ситиһиилэннилэр. Ол курдук, Василий Алексеев (145 очколаах) бэйэтин саастыылаахтарыгар боруонса мэтээли ылла.
Айаал Макаров уонна Рамир Николаев хамаанданан күрэхтэһиигэ спортиҥҥа Европа күрэхтэһиитин кыайыылаахтара буоллулар.
Павел Ильин.