От ыйын 27 күнүттэн атырдьах ыйын 7 күнүгэр диэри Бүтүн Арассыыйатааҕы XIV эдэр геологтар олимпиадалара Татарстан өрөспүүбүлүкэтигэр ыытыллар.
Саха сирин чиэһин Хотугулуу — Илиҥҥи федеральнай университет геологоразведочнай факультета ыыппыт, ону таһынан, эрэгийиэннээҕи геология олимпиадаларын кыайыылаахтара, оскуола үөрэнээччилэрэ көмүскүү сылдьаллар.
«Оҕолорго олимпиадаҕа кыттыы геолог идэтигэр холонон көрөргө кыах биэрэр. Сүрүннээн олимпиада оскуола үөрэнээччилэригэр Саха сирин үрдүк үөрэхтэригэр киирэргэ көмө буолуоҕа», — диэн бэлиэтиир СӨ бырамыысылынаска уонна геологияҕа миниистир Максим Терещенко.
Олимпиада кыайыылаахтара ХИФУ геологоразведочнай факультетыгар туттарсар түгэннэригэр эбии баал ылыахтара диэн этэр ХИФУ уһуйааччыта Екатерина Рыжкович.
Ону таһынан, Саха сиригэр бастакы эдэр геологтар кулууптара тэриллэрэ былааннанар. Кулууп Оҕо Дыбарыаһын иһинэн үлэлиир «Юный геолог» куруһуок салҕааһына буолуоҕа.
Олимпиадаҕа ыытыллар профильнай күрэхтэр хайысхалара: «Геологический разрез», «Минералогия и петрография», «Описание геологического памятника», «Радиометрия», «Гидрология», «Геологический маршрут», «Нефть и газ» уо.д.а. Ол курдук, өссө араас успуорт тэрээһиннэрэ, биллиллээх дьону кытта көрсүһүүлэр, экскурсиялар, маастар — кылаастар ыытыллыахтара.