Саха ыччата Саахымакка ыччат Арассыыйатааҕы спартакиадатын иккис түһүмэҕэр кыайдылар
Күрэхтэһии Саха сирин уонна Приморскай кыраай кыттыылаах Дьокуускай куоракка «Триумф» успуорт киинигэр бары санитарнай миэрэлэри тутуһан ыытылынна. Хас биирдии хамаанда састаабыгар 2001-2004 сыллаах төрүөх 4 кыттааччы — 2 уол уонна 2 кыыс оонньоотулар. Кыайыылаахтар атырдьах ыйыгар Уфа куоракка Уһук Илин федеральнай уокурук аатыттан Бүтүн Арассыыйатааҕы бастыыр иһин күрэхтэһиигэ кыттыыны ылыахтара.
«Оҕолорбут бары үчүгэй түмүгү көрдөрдүлэр, Саха сирин хамаандатыгар кыайыылаах оонньууну Анастасия Андреева Приморскай кыраай сүүмэрдэммит хамаандатын оонньооччутун Алена Бегунованы кыайан, инники күөҥҥэ таҕыста» — диэн күрэхтэһии кылаабынай судьуйата Гаврил Винокуров тоһоҕолоон бэлиэтээтэ.
“Спартакиада ыытыллар кэмэ оскуола, үрдүк үөрэх кыһаларын эксээмэннэрин кытары хатыһан уустуктары үөскэтэ сырытта. Ол да буоллар, тус кыраапыгы тутуһан оҕолор туруоруллубут соругу бэркэ толордулар. «Триумф» ТХПК бастыҥ усулуобуйаны биэрдэ, коронавируснай инфекцияны утары бары дьаһаллар тутуһулуннулар. Билигин Бүтүн Арассыыйатааҕы күрэхтэһиигэ күүскэ бэлэмнэниэхпит», — диэн Саха сирин ыччатын саахымакка сүүмэрдэммит хамаандатын сүрүн тренерэ Роман Ганжуров санаатын үллэһиннэ.
Күрэхтэһиини сабыы үөрүүлээх чааһыгар СӨ саахымакка федерациятын бэрэсидььиэнэ Владимир Егоров күрэхтэһии кыттааччыларын эҕэрдэлээтэ. Үүнэр көлүөнэ уонна эдэр ыччат саахымакка интэриэһэ күүһүрэн иһэрин иһитиннэрдэ
«Соторутааҕыта 14 саастаах ыччат эр дьон ортолоругар ыытыллыбыт күрэхтэһиигэ өрөспүүбүлүкэ чөмпүйүөнэ буолла, икки кыргыттарбыт Уһук Илин күрэхтэһиитигэр кыайыыны ситиһэн, дьахталлар ортолоругар ыытыллар Арассыыйа чөмпүйэнээтин Үрдүкү лигатыгар бараары бэлэмнэнэллэр. Билигин биһиги иннибитигэр өрөспүүбүлүкэҕэ саахыматы ыччат толкуйдуур, ырыҥалыыр дьоҕурун сайыннарар успуорт көрүҥүн быһыытынан бигэтик сайыннарар сүрүн сорук турар. Саахымакка киһи өйө- санаата, толкуйдуур дьоҕура, майгыта, эппиэтинэһэ сайдар – бу барыта үүнэр көлүөнэни иитиигэ улахан төһүү буолар», — диэн Владимир Егоров бэлиэтээтэ.
Надежда Ильина, Эдэр саас