Саха биллиилээх ууһа Александр Шадрин төрөппүт уолаттарын кытта Кытай Норуодунай Өрөспүүбүлүкэтигэр Харбин куоракка муус уонна хаар оҥоһуктарга норуоттар икки ардыларынааҕы фестивальга кыттаннар, бириистээх миэстэни барытын хомуйан кэллилэр.
-Үс көрүҥҥэ үһүөннэригэр кытынныбыт, — диир маастар. – Хамаанда түөрт киһиттэн турар: бэйэм уолаттарбын Александрдаах Дмитрийи илдьэ барбытым уонна төрдүс киһинэн уолаттарым табаарыстарын, Кытайга үөрэнэ сылдьар Дьокуускай оҕотун Святослав Васильевы ылбытым.
Маастар Александр Шадрин бастаабыт оҥоһугун аттыгар
Ахсынньы 28 күнүттэн 31-кэ диэри 5 миэтэрэ уһуннаах, 3 миэтэрэ үрдүктээх композицияны муустан кыһан оҥордубут. Бу көрүҥҥэ Хабаровскай хамаандатын кэнниттэн иккис миэстэҕэ тигистибит. Муустарын Сунгари өрүстэн ылаллар, 50 см халыҥнаах. Онтон сынньатан бараннар, муустан дьоҕус киэптээх (2 м үрдүктээх, 2 м усталаах, 50 см халыҥнаах) скульптуралары оҥортордулар. Манна 35 хамаанда кыттыбытыттан бастакы миэстэни биһиэхэ биэрдилэр. Сорудах быһыытынан, Нюба диэн Кытайга киэҥник биллэр, биһирэнэр көмпүйүүтэр дьоруойа кыыһы 99 бырыһыан майгыннатыахтаах этибит. Табылынна диэннэр Кытайга көмпүйүүтэр оҥорор саамай бөдөҥ хампаанньа туруорбут супер-бирииһин (биһиэнинэн 200-чэ тыһ. солкуобай) туттардылар. Аны кыһын ол хампаанньа сакааһынан көмпүйүүтэр оонньууларын дьоруойдарынан 20-чэ скульптураны оҥоруох буоллубут.
Шадриннар хаартан айымньылара
Үһүс көрүҥ – хаартан оҥоһук. Искусственнай хаар буолан, кытаанах, муус курдук. Кээмэйэ балачча обургу: 4 миэтэрэ үрдүктээх, 3-түү миэтэрэ усталаах-туоралаах. Бу көрүҥҥэ биһиги 25 хамаандаттан үһүс миэстэни ыллыбыт.
Александр Иванович этэринэн, Россияттан Кытайы кытта ыаллыы сытар амурдар, хабаровскайдар уонна сахалар эрэ кыттыбыттар. Тастан дьоппуоннар, кэриэйдэр, монгуоллар, тайдар, вьетнамнар, индустар, о.д.а. итиэннэ саамай ыраахтан Эмиэрикэ уустара кэлбиттэр. Онон Саадырыннар хаар-муус дойдуттан сылдьар дьон быһыытынан Саха сирин бары көрүҥҥэ дуорааннаахтык ааттаппыттара хайҕаллаах. Кыайыылаах хамаанда дьоно массыынанан 2,5 суукка устата айаннаан кэлбиттэр.
Василий НИКИФОРОВ, «Саха сирэ» хаһыат, edersaas.ru