Педагогическай наука кандидата, СӨ үтүөлээх учуутала Валентина Софронеева салайар Саха гимназията өссө саха-немецкэй оскуола саҕаттан Германия учуонайдарын, преподавателлэрин, уопсастыбаннай деятеллэрин кытта ыкса сибээһи олохтоон үлэлиир.
Елена ПОТОЦКАЯ, «Саха сирэ» хаһыат, https://edersaas.ru
Дьокуускай куорат Киин уокуругун аҕатын сэбиэтин салайааччыта, Саха гимназияҕа Аҕа сэбиэтин бэрэссэдээтэлэ Егор Жерготов иһитиннэрбитинэн, бу күннэргэ быйыл уопсай үөрэхтээһин кыһата 15-с сылын бииргэ үлэлээһин чэрчитинэн Гамбург куорат үөрэхтээһиҥҥэ дьыалаларын үлэһитэ Лотар Бекман, аатырбыт Гамбург куоракка Арассыыйа уонна Германия икки ардыларынааҕы сибээһи сүрүннээччи, үөрэхтээһин биэдэмистибэтин салайааччыта Матиас Бургердт Саха гимназиятыгар кэлэн, иккис нэдиэлэлэрин үлэлии сылдьаллар.
Бииргэ үлэлээһин чэрчитинэн, Матиас Бургердт «СӨ «Аҕалар лигалара» уопсастыбаннай тэрилтэ салайааччыта Айхал Габышевы кытта анаан көрсөн, үлэ уопутун атаста. Айхал Иванович Саха сирин аҕаларын II сийиэһэ буолаары турарын, өрөспүүбүлүкэҕэ Аҕа оруолун үрдэтэргэ улахан суолта бэриллэн, Аҕа күнэ уонна Уол оҕо күнэ, ону тэҥэ, саха эр киһитэ үксэ булчутун учуоттаан, онноооҕор «Байанай» күнэ баарын кытта кэпсээтэ. Матиас Бургерт уонна Лотар Бекман уопсастыбаннай үлэ бу көрүҥүн Гамбург куоракка тиийэн тарҕатыах уонна маннык суолталаах анал күннэри олохтуур сыалтан, бэйэлэрин дойдуларыгар тиийэн, үөрэхтээһини салайар тойотторго тиэрдиэх буоллулар.
— Биһиги, Гамбург олохтоохторо, эһиги Сахаҕыт сирин алмааһын курдук күндүтүк саныыргыт курдук, алмааска тэҥнээх куораппыт символын туттарарбар көҥүллээ, — диэн баран, «Аҕалар лигаларын» салайааччыта Айхал Габышевка кини ыалдьыта Матиас Бургердт Гамбург куоратын символын туттарда.
Оттон Айхал Иванович ыраах Германияттан сылдьар биир санаалаах ыалдьыттарыгар норуоттар икки ардыларыгар ыытар кэскиллээх үлэлэригэр махтанан туран, «Аҕалар лигаларын» анал мэтээлин туттарда уонна бииргэ үлэлээһиннэригэр олук ууруллубутун бэлиэтээтэ.
Саха гимназиятыгар Аҕа сэбиэтэ бэрт көдьүүстээх үлэни ыытар. Ол курдук, быйыл күһүн үөрэх кыһатын тэрилтэтин иитэр үлэтигэр көхтөөх икки аҕаны гимназия салалтата Германияҕа анаан илдьэн, үлэ уопутун билиһиннэрэн аҕалла.
— Кэрэхсэбиллээҕэ баар, сайдыылаах дойду диэх курдук, Германияҕа икки өрөбүл күннэр аҕаларга анаммыттар. Ол курдук, субуотаҕа уонна өрөбүлгэ аҕалар үлэлээбэттэр, сынньалаҥнарын оҕолоругар аныыллар эбит. Ол да иһин буолуо, өрөбүллэргэ куораттар пааркалара оҕолоох аҕаларынан туолаллар, — диэн санаатын үллэстэр Саха гимназиятыгар Аҕа сэбиэтин бэрэссэдээтэлэ Егор Жерготов.
Ити курдук, Саха сирин уонна Германия аҕаларын сирэйдиир икки улахан суолталаах тэрилтэ эппиэттээх үлэһиттэрэ атах тэпсэн олорон, санааларын үллэһиннилэр, бииргэ үлэлээһиҥҥэ кэскиллээх былааннары торумнаатылар.
Елена ПОТОЦКАЯ, «Саха сирэ» хаһыат, https://edersaas.ru