Сомоҕолоһуу күнүн көрсө Бакуттан Саха сирин суруйааччыларын сойууһугар үтүө сонун кэллэ. Ил Түмэн дьокутаата, саха литературатын сайдыытыгар кылаатын киллэрсэр, суруйааччылар доҕордоро Алиш Мамедов Азербайджан өрөспүүбүлүкэтин судаарыстыбаннаһын 100 сыллаах үбүлүөйүнэй бэлиэтинэн наҕараадаланна.
Алиш Забит-Оглы кэнники сылларга саха литературата сайдарыгар, тас дойдуга тахсарыгар үтүө кылаатын киллэрсэр. Ол курдук, Саха сирин уонна Азербайджан суруйааччыларын ситимнээн, былырыын эдэр поэттары Гаврил Андросовы, Рустам Каженкины Бакуга буолбут түүр омуктар поэзияларын фестивалыгар кытталларын тэрийбитэ. Ону сэргэ норуодунай поэт Наталья Харлампьева “Мой друг апрель” диэн хоһооннорун хомуурунньуга сахалыы тахсыбытын таһынан, азербайджанныы тылбаастаммыта. Быйыл классик суруйааччы Платон Ойуунускай төрөөбүтэ 125 сылын көрсө кини айымньылара азербайджанныы тылынан бэчээттэнэн, кинигэ буолан тахсыахтаах. Тылбаасчыт Аида Эйвазова үлэтин барытын бүтэрэн, бу күннэргэ кинигэ бэчээккэ барыахтаах. Бу үлэлэр барыта Алиш Мамедов көмөтүнэн күн сирин көрдүлэр.
Азербайджан суруйааччыларын кытары доҕордоһуу кэлиҥҥи биэс сылтан бэттэх Дьокуускай куоракка тэриллэн ыытыллар “Үрүҥ хаар алгыһынан” поэзия фестивалыттан силис-мутук тардар. Былырыын буолбут фестивалга Азербайджантан Ататюрк аатынан Киин түүр омук эдэр суруйааччыларын сэбиэтин салайааччыта Экбер Гошалы кэлэ сылдьан, саха суруйааччыларын кытары билсэн барбыта. Ону таһынан Саха сиригэр Азербайджан түмсүүтүн салайааччыта Алиш Мамедовы кытары көрсүһүү литературалар, норуоттар доҕордоһууларыгар биир сүрүн хардыы буолбута.
Ол да иһин Алиш Мамедовы Саха сирин уонна Азербайджан литератураларын сайыннарыыга, Азербайджан түмсүүтүн салайан илдьэ сылдьарын иһин үрдүк бэлиэнэн наҕараадалаатылар. Наҕарааданы Азербайджан Өрөспүүбүлүкэтин бэтэрээннэрин сэбиэтин бэрэссэдээтэлэ Физули Рзакули, Азербайджан бэрэсидьиэнин дьаһалтатын бэрэстэбиитэлэ Разим Мирзеев туттардылар. Алиш Мамедов кинилэргэ махтанан туран, литературалар доҕордоһуулара норуоттар доҕордоһуулара буоларын, саха суруйааччыларын нөҥүө бу наҕарааданы туппутун бэлиэтээн эттэ.
Саха сирин суруйааччыларын сойууһун пресс-сулууспата.