Космонавтика күнүгэр РФ Бырабыыталыстыбатын бэрэссэдээтэлэ Михаил Мишустин Москватааҕы авиационнай институт (Национальнай чинчийэр университет) авиакосмическай факультетын устудьуоннарын уонна аспираннарын кытары көрсүбүтэ. Онно Сунтаартан төрүттээх Василий Петров РФ Бырабыыталыстыбатын премьер-миниистиригэр ыйытыы биэрдэ.
Василий Петровы кытта төлөпүөнүнэн кэпсэттибит:
— Мин МАИ аэрокосмическай факультетын бэһис куурсун устудьуонабын. Оскуола саҕаттан космоһы интэриэһиргиибин. Ахсыс кылааска сылдьан, «кока-кола» бытыылкатыттан космическай аппарат оҥорбуппут. Онтон ыла космоска ылларан, МАИ-га үөрэххэ туттарсыам диэн быһаарыммытым.
Институтум, факультетым уопсастыбаннай олоҕор көхтөөх кыттыыны ылабын. Үөрэхпэр да үчүгэйбин, бөлөхпөр старостабын. Успуордунан дьарыктанабын. Институт академическай гребляҕа сүүмэрдэммит хамаандатыгар киирэбин. Москва аһаҕас турнирдарыгар кыттааччыбын.
Михаил Мишустиҥҥа «Восточнай» космодромҥа устудьуоннары үөрэтэр филиал арыллыа дуо?» диэн ыйытыыны биэрбитим. Холобура, «Байконурга» МАИ филиалыгар 300 кэриҥэ устудьуон үөрэтэр. Онуоха, премьер-миниистир Үөрэх министиэристибэтигэр уонна Роскосмос салайааччыларыгар тиэрдиэм, дьүүллэһиигэ ылыахпыт диэн эрэннэрбитэ.
Биир бэйэм, Арассыыйа иккис сирэйин кытары көрсүбүппүттэн, кэпсэтиигэ кыттыбыппыттан киэн туттабын. Бу күн премьер-миниистир чуолаан биһиги факультеппытыгар кэлбититтэн үөрдүбүт.
Виктория Бястинова, edersaas.ru саайт, «Саха сирэ» хаһыат.
Хаартыска — government.ru