Саха сириттэн сылдьар Иван Кашкин лотереяҕа 1,5 мөлүйүөн солкуобайы сүүйдэ диэн СИА суруйар. Бу туһунан информация “Столото” судаарыстыбаннай лотереялар саайтарыгар тахсыбыт.
Иван билигин Москваҕа олорор. От ыйыгар кини төрөөбүт күнүн бэлиэтээбит эбит уонна буостаҕа аймахтара бэлэх ыыппыттарын ыла барбыт. Онно туран, “Русское лото” 1452-с тираһын билиэтин атыыласпыт.
— Билиэти нүөмэрин, сыыппаратын көрбөккө да эрэ, үлүбээй талбытым. Интэриниэккэ түмүгүн көрөн баран, аан бастаан кэргэммэр эрийбитим. Урут биирдэ эмит лотерея билиэтин атыыластахпына даҕаны, улаханнык сүүйүөм дии санаабат этим. Дьэ, бу баат! – диэн кини санаатын үллэстэр.
Иван сүүйбүт харчытын дьиэ атыылаһарга ыытыаҕа. Ипотека ылар былааннаах. Ол бэлэх кэлбит баһыылкаҕа саха быһаҕа баар этэ. Бааттаах буоларга ол быһах көмөлөстө диэн кини эрэнэр.
Иван Кашкин идэтинэн кытай тылын тылбаасчыта. Билигин хамсаабат баай, дьиэ-уот эйгэтигэр үлэлиир. Сынньалаҥ кэмигэр дьиэ кэргэнин кытары араас дойдуларга баран күүлэйдиирин сөбүлүүр. Соторутааҕыта Карелияҕа сылдьыбыттара, билигин Дагестаҥҥа баралларын былаанныыллар.
Ангелина Васильева, “Саха сирэ” хаһыат”, edersaas.ru
Хаартыска: СИА.