Бу хаартыскаҕа көрөр эдэркээн уолгут Николай Петров Амма Чапчылҕанын ыччата.
Биһиги корр., «Саха сирэ» хаһыат, edersaas.ru
Бу хаартыскаҕа көрөр эдэркээн уолгут Николай Петров Амма Чапчылҕанын ыччата.
Николай Кыһыл болуоссакка Улуу Кыайыы 72 сылыгар анаммыт байыаннай параакка хаамар улахан чиэскэ тигистэ. Манна, биллэн турар, бастыҥтан бастыҥнар талыллаллар. Коляҕа улахан эппиэтинэс сүктэриллибитин туһунан төрөппүттэрэ кулун тутарга истибиттэр.
Биһиги Чапчылҕаҥҥа ийэтин Лена Руслановнаны кытта кэпсэтэ сырыттыбыт. Петровтар биэс оҕолоохтор. Коля — иккис оҕо. Онон дьиэтигэр улахан киһи, убай аатын сүгэн, кыратыттан туох баар дьиэ ис-тас үлэтин этиттэрэ барбакка толоро, бырааттарын, балтын көрө-истэ, бүөбэйдии улааппыт. Амматааҕы Л.В.Киренскэй аатынан лиссиэйи ситиһиилээхтик үөрэнэн бүтэрбит. Билигин Макаров аатынан Чуумпу Акыйааннааҕы үрдүкү байыаннай муоратааҕы училище I кууруһун курсаана.
Коля дьонугар эрийэн үөрүүтүн үллэстибит: — Тымныы күн-дьыл буолла. Ол гынан баран, бу курдук улахан эппиэтинэһи сүкпүт дьон үөрүүбүтүттэн, долгуйуубутуттан параакка ону умнан ыллыбыт, — диэбит.
Петровтар Москуба параадын саҕаланыаҕыттан бүтүөр диэри көрбүттэр. Балта убайын тэлэбиисэргэ көрөөт, долгуйан ытаабыт.
Аммалар, чапчылҕаннар уоллара Николай Петров Кыһыл Болуоссакка параакка хаампытынан киэн тутталлар, үөрэллэр. Истиҥ эҕэрдэлэрин Коля төрөппүттэригэр Петр Васильевичка, Лена Руслановнаҕа уонна бииргэ төрөөбүттэригэр тохтоло суох тиэрдэллэр. Биһиги эмиэ ити эҕэрдэҕэ кыттыһабыт уонна эдэр киһиэхэ бары кэрэни, үтүөнү баҕарабыт.
Биһиги корр., «Саха сирэ» хаһыат, edersaas.ru
Хаартыскалар батсааптан, интернеттэн ылылыннылар.