Уопсастыба

Саха уола «Эр санаа уордьанынан» наҕараадаланна

Саха сирин олохтооҕо Юрий Петров Украинаҕа анал эпэрээссийэ кэмигэр хорсун быһыыны оҥорбутун иһин «Эр санаа уордьанынан» наҕараадаланна.

edersaas.ru

Юрий ийэтэ Астра Дмитриевна Петрова иһитиннэрбитинэн, кини уола эһэтин,  Аҕа дойду Улуу сэриитин кэмигэр Украинаны фашистартан босхолообут, Албан аат уордьан толору кавалера Дмитрий Петров бойобуой суолун хатылаата.

Дмитрий Ананьевич 1 Белорусскай фроҥҥа снайперынан, пулеметчигынан сылдьан, Белоруссияны, Украинаны уонна Польшаны фашистартан босхолооһуҥҥа кыттыбыта. Хорсун буойун өстөөхтөрү кытары хаста даҕаны илиинэн киирсибитэ. 1945 сыл муус устар 2 күнүгэр Хоенштейн нэһилиэги босхолуурга олоҕун толук ууран туран, өстөөх дзотугар сыылан тиийэн, амбразураны гранатанан быраҕан, өстөөхтөр гарнизоннарын урусхаллаабыта. Хаана баран бааһырбыт саллаат салҕыы сэриилэспитэ. Кини бу  дьоруойдуу быһыытынан иһин,  Албан аат 1 истиэпэннээх уордьанынан наҕараадаламмыта уонна Албан аат уордьан толору кавалера буолбута.

Астра Дмитриевна уолунаан Дьокуускай куоракка Кыайыы болуоссатын таһынан Хабаров уулуссатыгар олорбуттара. Болуоссакка Юра эһэтин рельебэ баар, онон онно куруук сылдьа, сүгүрүйэ, киэн тутта улааппыта.

«Анал эпэрээссийэ саҕаламмытыгар Юра хантарааҕынан командировкаҕа сылдьара уонна бэйэтин ытык иэһин толорбот буолар кыаҕа суоҕа. Кини хантарааҕынан сылдьыбыта уонча сыл буолла. Өссө 2014 сыллаахха Донбасс туһугар олус долгуйара.
Ханна баалларын мээнэ эппэт этилэр, арай эһэм сылдьыбыт сирдэригэр баарбын диэбитэ. Киевскэй, Луганскай, Донбасс, кэнники Мариуполь хайысхаларынан сылдьыбыт. Хорсун быһыытын иһин уордьаны муус устарга анаабыттар эбит, ону кини билбэт этэ. Снаряд үлтүркэйэ сиирэ-халты ааһан бааһырбыт, үстэ контузияламмыт. Юра билигин Ростов-на-Дону куоракка контузия кэнниттэн госпитальга эмтэнэ сытар. Икки-үс хонугунан Владивостокка кэлиэхтээх. Дьиэ кэргэнин кытары уолбутун көрсөн, Сахабыт сиригэр кэлиэхпит. Онно кэлэн дьэ, үчүгэйдик эмтэниэхпит диэн эрэнэбин. Юра икки уол оҕолоох.
Патриотизм тыына биһиги хааммытыгар баар. Оҕолорбут, сиэннэрбит бары эһэлэрин олоҕун, бойобуой сырыыларын үөрэтэллэр. Өрөспүүбүлүкэтээҕи Петровскай ааҕыылары ыытабыт. Биир бырааппыт Тааттаҕа бааһынай хаһаайыстыбалаах. Онон оҕолор, сиэннэр бары сайын аайы онно тахсан үлэлииллэр, сынньаналлар. Эһэбит кэриэһигэр стелла туруоруутугар, «Ворошилов» холкуоһу сэргэхситиигэ аймаҕынан кыттабыт. Онон уолум Юра  кыра эрдэҕиттэн эһэтин аатынан киэн тутта улааппыта, Тааттаҕа аҕабыт аатынан оскуоланы кытары ыкса сибээстээхтик үлэлиибит. Уолум кэллэҕин аайы куруук тахса турар, патриотическай иитии тэрээһиннэрин көҕүлүүр, кыттар. Аҕабыт аатынан оскуола саҥа таас дьиэтэ тутулуннаҕына, кадетскай оскуола аатын ылыа диэн эрэнэбит», -– диэн Астра Дмитриевна кэпсээтэ.

Надежда ЕГОРОВА, «Саха сирэ», edersaas.ru

 

 

 

0
1
Telegram @edersaas20