Саха тылын учууталлара үөрэнээччигэ туһалаах тылдьыт оҥоһулунна диэн астыналлар
Кулун тутар саҕаланыыта edersaas.ru/slovar диэн саҥа электроннай сахалыы-нууччалыы тылдьыт күн сирин көрбүтэ. Бу ураты тылдьыты саха тылын учууталлара уруокка, үлэҕэ туһанан баран санааларын үллэһиннилэр.
Екатерина Иванова, И.М.Павлов аатынан Чурапчы орто оскуолатын саха тылын, литературатын учуутала:
— «Тыл киһи олоҕор салгын, уу курдук наадалаах: үлэ-хамнас, олох-дьаһах тылынан «хаамар», «күн аайы оҕолор оскуолаҕа тылынан үөрэнэллэр; радио, театр, киинэ саҥарар, суут-сокуон, араас тэрилтэлэр тыла суох сатамматтар» диэн Н.С. Григорьев этиитэ олус оруннаах.
Онуоха бу оҥоһуллубут саҥа электроннай тылдьыт туһата, көдьүүһэ үрдүк эбит. Тылдьыт матырыйаала — тылын баайа, холобурдара үгүс, ону таһынан тылбаас кытары киирбитэ кэрэхсэбиллээх.
Тылдьыт оскуола үөрэнээччилэригэр, устудьуоннарга, араас тэрилтэ үлэһиттэригэр наадалаах, туһалаах буолсу.
Нюрбина Васильева, Уус Алдан улууһун Мындааба спортивнай лиссиэйин саха тылын, литературатын учуутала:
— Сахалыы-нууччалыы, нууччалыы-сахалыы тылдьыты оҕо куруутун оскуолаҕа илдьэ сылдьыбат, оттон үөрэтэр кинигэбит аайы тылдьыт суох. Онон үөрэххэ, уруокка туттарга олус табыгастаах тылдьыт оҥоһуллубут диэн көрдүм. Туттарга да олус судургу, туох даҕаны уустуга суох эбит. Сахалыы буукубалары туруоран биэрэрэ кэрэхсэбиллээх. Оҕо билбэт сахалыы эбэтэр нууччалыы тылларын, холобура, эргэрбит тыллары, сылгы, ынах өҥүн-дьүһүнүн уо.д.а. туруора охсон, тылбааһын кэбэҕэстик булан билэрэ олус үчүгэй.
Оҕолор күннээҕи олоххо да туттуллар сахалыы тыллар суолталарын быһаарарга ыарырҕаталлар. Литература уруогар айымньы ис хоһоонун өйдүүллэрин ол улаханнык атахтыыр эбэтэр саха тылын уруогар этиини тылбаастыырга эмиэ тылдьыт көмөтө улахан.
Айтана Аммосова, edersaas.ru
Хаартыска — СИА.