Сүрүн Үөрэх уонна наука

Саха тылын чааһын элбэтиэхтэрэ

СӨ Ил Дархана Айсен Николаев быһа эпиир кэмигэр сахалыы тылынан үөрэтии туһунан ыйытыы киирбитигэр, Саха Өрөспүүбүлүкэтигэр оскуолаларга саха тылын чааһа эбиллиэҕэ диэн иһитиннэрдэ.

edersaas.ru

Дьокуускай куораттан төрөппүт Айысхаана Старостина: “Төрөөбүт тыл суолтатын, төрөөбүт тылы үөрэтиини, харыстааһыны инники сайдыы быһыытынан ааҕабын. Оскуолаҕа саха тылын чааһын эбиигэ туох үлэ барарый?” — диэн төлөпүөнүнэн эрийэн ыйытта.

Айсен Николаев тустаах боппуруоска кыһалҕа, бастатан туран, Дьокуускай куоракка баарын эттэ. “2012 сыллаахха куоракка баһылыктыыр кэммэр уһуйааннарга, оскуолаларга сытыытык турбута. Улахан үлэни ыыппыппыт. Кэлин эмиэ сытыырхайда. Саҥа оскуолалар тутуллан, саҥа кылаастары аһыталаан балаһыанньа оннун булла эрээри, оҕолорун сахалыы тылынан үөрэттэриэн, саха тылын биридимиэт быһыытынан үөрэтэллэригэр баҕалаах төрөппүт элбэх. Бу баҕа санааларын судаарыстыба өйүөхтээх, бу кинилэр Төрүт Сокуонунан бырааптара буолар.

Кэлиҥҥи сылларга федеральнай нуормаҕа уларыйыылар киирэн, алын кылаастарга саха тылын 12 чаас үөрэтэллэрэ тус бэйэбин, төрөппүттэри долгутар. Үгүстэр маны аҕыйах дии саныыбыт. Улахан үлэни, ол иһигэр билим-мэтиэдикэ өттүгэр үлэни ыытан, Ил Түмэн, Судаарыстыбаннай Дуума дьокутааттара кыттыһан, Ил Түмэн бэрэссэдээтэлэ Алексей Ильич Еремеев, Ил Түмэн туһааннаах сис кэмитиэтин бэрэссэдээтэлэ Феодосия Васильевна Габышева көхтөөхтүк дьаһайсан, улахан кэпсэтиилэр, ырытыһыылар түмүгэр, РФ Үөрэҕириигэ министиэристибэтигэр кэккэ мунньахтары ыытан, Саха сиригэр алын кылаастарга 12 чаастан 20 чааска диэри эбиллэригэр быһаарыы ылылынна. Бу олоххо киирэригэр, 1,5 төгүл кэриҥэ чаас эбиллиитэ түмүгү көрдөрөрүгэр эрэнэбин. Өрөспүүбүлүкэ судаарыстыбаннай тылын чөл хаалларыы – өрөспүүбүлүкэ сүрүн соруктарыттан биирдэстэрэ. Уонна салгыы сайдарыгар, тарҕанарыгар усулуобуйа олохтуохтаахпыт. Холобур, бу күннэргэ Ил Түмэҥҥэ СӨ Сокуонун бырайыактара тута икки тылынан ылыныллалларыгар этиини киллэрдим. Бүгүн үлэлии турар Татарстан холобура биһиэхэ эмиэ туһаныллыан сөп”, — диэн эттэ. Итиэннэ саха тыла сайдарын, юридическай суолталаах докумуоннары тылбаастыыр  исписэлиистэр баалларын, тута нууччалыы-сахалыы тылбаастыыр кыахтаахтарын, СӨ Барабыыталыстыба манна бэлэмин иһитиннэрдэ. Судаарыстыбаннай Мунньах өйүүрүгэр эрэллээҕин биллэрдэ.

 

Людмила ПОПОВА, “Саха сирэ” хаһыат, edersaas.ru

Хаартыска: СИА

2
0
Telegram @edersaas20