Маны аах Уопсастыба

Саха тылбаасчыта кыайда

Услышь, Россия, наши голоса” диэн Арассыыйа норуоттарын тылларыгар уус-уран тылбаас куонкуруһа түмүктэннэ. Бу Арассыыйа Суруйааччыларын сойууһун Национальнай литератураларга сэбиэтэ иккиһин тэрийэн ыыппыт куонкуруһугар Саха сириттэн тылбаасчыт Альбина Борисова 1-кы миэстэни ылла.

Альбина Андриановна саха норуодунай суруйааччыта Баһылай Харысхал “Четыре угла любви” кэпсээнин тылбаастаан, “Перевод прозы” номинацияҕа кыайда. 2-с миэстэни башкир тылыттан тылбаастаан Альфина Карагужина, 3-с миэстэни эмиэ башкир тылыттан тылбаастаан Наиля Акбулатова ыллылар.

Маны тэҥэ, “Перевод поэзии”, “Перевод стихов для детей” номинациялар бааллар. Барыта 40-тан тахса үлэ киирбитититтэн, дьүүллүүр сүбэ сабыылаах куоластааһын түмүгүнэн, кыайыылаахтары талан ылла. Манна кумыкскай, табасаранскай, эрзянскай курдук сэдэх тылларга тылбаастар киирбиттэрэ кэрэхсэбиллээх. Бу Арассыыйа норуоттарын национальнай литератураларыгар болҕомто ууруллан эрэрин көрдөрөр.

Лауреаттар уонна дипломаннар үлэлэрэ Арассыыйа Суруйааччыларын сойууһун саайтыгар (rospisatel.ru), «Молодая гвардия», «День литературы», «Север» литературнай сурунаалларга бэчээттэниэхтэрэ.

Альбина Борисова (Слепцова) — идэтийбит тылбаасчыт, М.Горькай аатынан Литературнай институт тылбааска салаатын бүтэрбитэ. Кини бастакы тылбааһынан Былатыан Ойуунускай «Улуу Кудаҥса» айымньыта буолар. Ону тэҥэ, олоҥхону, Ойуунускай «Александр Македонскай», «Соломуон Муударай», о.д.а. кэпсээннэрин тылбаастаабыта, атын омуктар саха улуу суруйааччыларын айымньыларын ааҕалларыгар кыах биэрбитэ.

Ангелина Васильева, “Саха сирэ” хаһыат, edersaas.ru

Хаартыскаҕа: хаҥастан бастакы А.Борисова. СИА.

1
0
Telegram @edersaas20