Саҥа дьыл иннинэ Былатыан Ойуунускай аатынан Саха тыйаатырын дириэктэрэ Петр Макаров САССР төрүттэммитэ 100 сылын бэлиэтиир үбүлүөйдээх сылга инники былааннарын билиһиннэрбитэ.
Дириэктэр эппитинэн, тыйаатыр өрөспүүбүлүкэ үбүлүөйдээх сылыгар киэҥ хабааннаах испэктээктэри бэлэмниир.
Үбүлүөйдээх 2022 сылы Саха тыйаатыра Былатыан Ойуунускай «Сүүс сыллаах улуу былаанын» Андрей Борисов туруоруутунан арыйда.
Быйыл тыйаатыр уус-уран салайааччыта, режиссер Андрей Борисов Б.Ойуунускай «Кыһыл Ойуунун» былаанныыр. Тыйаатыр сүрүн режиссера Руслан Тараховскай норуодунай суруйааччы Егор Неймохов «Алампа» арамаанынан үлэтин саҕалаата, тыйаатыр режиссера Сергей Потапов суруйааччы Семен Яковлев-Эрилик Эристиин төрөөбүтэ 130 сылыгар «Маарыкчаан ыччаттарын» туруоруоҕа. Онтон да атын саҥа испэктээктэр тыйаатыр көрөөччүлэрин дьүүлүгэр тахсаллара торумнанар.
«2021 сыл алтынньытыгар Саха тыйаатырыгар Александринскай тыйаатыр ыалдьыттаабыта. Биллэрин курдук, 2020 сылга Арассыыйа национальнай тыйаатырдарын ассоциациятын тэрийии былааннанар. Тэрээһин мунньах тохсунньуга Карелия Өрөспүүбүлүкэтигэр буолуоҕа, онтон бэс ыйыгар Дьокуускайга РФ Национальнай тыйаатырдарын конгреһа ыытыллыаҕа. Национальнай тыйаатырдар конгресстарын биһиги өрөспүүбүлүкэбит салалтата судаарыстыба таһымыгар өйүөҕэр эрэнэбит», -– диэн Петр Макаров эрэлин биллэрдэ.
Ону таһынан, САССР 100 сылыгар хас да улахан гостуруол тэриллиэҕэ. 2022 сыл саас тыйаатыр артыыстарын Мииринэй куоракка, Бүлүү бөлөх улуустарын киин нэһилиэктэригэр гостуруолга күүтэллэр.
«Улахан гостуруоллар» федеральнай бырайыак чэрчитинэн Б.Басангов аатынан Калмыкия национальнай драматическай тыйаатырын кытта гостуруоллар буолуохтара. Ону сэргэ Москва уонна Санкт-Петербур куораттарга гостуруоллар тустарынан кэпсэтии барар.
Надежда ЕГОРОВА, «Саха сирэ», edersaas.ru