Саха тыйаатыра гастроллуу баран эрэр

Ааптар: 
Бөлөххө киир:

Бу күннэргэ Былатыан Ойуунускай аатынан Саха академическай тыйаатыра «Төрөөбүт төрүт тыл — Саха тылын ыйа» диэн тэрээһин чэрчитинэн олунньутааҕы былаана бигэргэннэ.

edersaas.ru

Тыйаатыр дириэктэрин солбуйааччы Михаил Егоров иһитиннэрбитинэн, быйыл Тыйаатыр сылынан сибээстээн, улуустарынан гастролга сылдьар бөлөхтөр нэһилиэктэргэ хоно сытан иккилии испэктээкили көрдөрүөхтэрэ.

— Олунньу 22 күнүттэн Иннокентий Луковцев салайар 13 киһилээх бөлөҕө Таатта улууһугар айанныаҕа. Онно артыыстар биир ыйы быһа нэһилиэктэринэн сылдьан, хоно сылдьан, иккилии испэктээги көрдөрүөхтэрэ.  Оттон Мэҥэ Хаҥалас улууһугар гастроллуур бөлөҕү Дмитрий Михайлов салайыаҕа. Артыыс Петр Макаров салайар бөлөҕө Өлөөн, Анаабыр, Эдьигээн улуустарын олохтоохторун бэйэлэрин айар үлэлэринэн үөрдүөхтэрэ. Тыйаатыр артыыстара испэктээкил көрдөрүүтүн таһынан, оскуолаларга сылдьан, үөрэнээччилэри кытта көрсүөхтэрэ,  маастар-кылаастары ыытыахтара, — диэн кэпсиир Михаил Егоров.

«Төрөөбүт төрүт тыл — Саха тылын ыйа» тэрээһин чэрчитинэн Амма Аччыгыйа «Сааскы кэм» испэктээгэ, П. Ойуунускай «Кээрэкээн ойуун», «Ыраахтааҕы ыйааҕа», «Имииһит түүлэ», «Сүрэх», Иоким Избеков 110 сыллаах үбүлүөйүгэр анаан «Сыгый Кырынаастыыр», Дмитрий Таас «Кыһыл Көмүс хоруоп», Айсен Дойду «Ааттаах поэт Арбита», Николай Якутскай «Төлкө», В. Никифоров- Күлүмнүүр  «Манчаары» испэктээктэрэ көстүөхтэрэ.

Онон Саха тыйаатырын артыыстара гаcтролга барыахтарын иннинэ, куорат олохтоохторо, тапталлаах артыыстаргыт айар үлэлэригэр — көрөөччүгэ сөбүлэппит испэктээктэригэр сылдьан хаалыҥ.

Елена ПОТОЦКАЯ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0